अकोला  :  कोरोना संसर्गाच्या अनुषंगाने शासनाने ता. २२ जून रोजी लग्न समारंभ आयोजनाकरिता नव्याने मार्गदर्शक सूचना जारी केल्या होत्या. त्यानुसार लग्न समारंभ व तत्सम कार्यक्रमांसाठी आयोजकांना परवानगी घ्यावी लागत होती.

परंतु आता लग्न व तत्सम कार्यक्रमांसाठी वेगळ्या परवानगीची आवश्यकता नसल्याचे परिपत्रक अकोल्याचे उपविभागीय अधिकारी (महसूल) डॉ. नीलेश अपार यांनी जारी केले आहेत. त्यामुळे नागरिकांची आता लग्न परवानगीसाठी शासकीय कार्यालयाच्या पायऱ्या झिजवण्यापासून सुटका झाली आहे.

• महाबीजची आमसभा गाजणार ‘मोबाईल’वर; ऑनलाइन सभेच्या निर्णयावर भागधारकांचा आक्षेप

मिशन बिगीन अगेन अंतर्गत ५० लोकांना (व्यक्ती) लग्न समारंभ व तत्सम कार्यक्रमांसाठी राज्य शासनाकडून परवानगी देण्यात आलेली आहे. लग्नासाठी उपस्थित असलेल्या ५० व्यक्तींमध्ये बॅंड पथक व संगीत कार्यक्रम करणाऱ्या सदस्यांचा समावेश आहे.

• ५३२ सरपंच पदाचे आरक्षण रद्द, आता सोडत निवडणुकीनंतर

कार्यक्रमस्थळी कोविड १९ चा प्रादुर्भाव होऊ नये यासाठी सामाजिक अंतर व इतर आवश्यक उपाययोजनांचा अवलंब करण्यात यावा, असे आदेश शासनाकडून जारी करण्यात आले आहेत.

• मंदिरे खुली मात्र यात्रेवर बंदी, छोट्या- मोठ्या विक्रेत्यांवर आर्थिक संकटाचे ढग

परंतु त्यानंतर सुद्धा सदर नियमांचे पालन होत नसल्यास संबंधितांवर आपत्ती व्यवस्थापन कायदा २००५, साथरोग अधिनियम १८९७ अन्वये व भारतीय दंडसंहिता १८६०च्या कलम १८८ अन्वये शिक्षेसाठी पात्र असलेला गुन्हा केला आहे, असे मानण्यात येईल व संबंधितांवर कडक कारवाई करण्यात येईल, असे आदेश उपविभागीय अधिकारी डॉ. निलेश अपार यांनी दिले आहेत.

(संपादन - विवेक मेतकर)