ओगलेवाडी : जून ते नोव्हेंबर या महिन्यात चातुर्मासामुळे (Chaturmas) विवाह व उपनयन मुहूर्त नाहीत, तरी अपवादाने अडचणीमुळे व गरजेने चातुर्मासातील गौण काळ मुहूर्त शोधावा लागत आहे.

मुहूर्त नसल्याने गजबजणाऱ्या विवाह (Marriage) मंगल कार्यालयाच्या परिसरात शुकशुकाट जाणवत आहे. मंगल कार्यालये ओस पडत आहेत. विवाह आनुषंगिक व्यवसायही काही दिवसांपासून ठप्प आहेत. त्यांच्या आर्थिक उलाढालीवर परिणाम झाला आहे. व्यावसायिकांना नोव्हेंबरनंतरच प्रतीक्षा करावी लागणार आहे.

गेल्या मे महिन्यात विवाह मुहूर्त होते. मेनंतर आगामी महिन्यात मुहूर्त नसल्याने वधू-वर पालकांची घाईगडबड झाली. तेव्हा मंगल कार्यालये उपलब्ध नसल्याने काही विवाह हे शाळा व मंदिर परिसरात उरकावे लागले. या आठवड्यात पावसाने हजेरी लावल्याने लोकांची धावपळ उडाली.

दैनंदिन जीवन विस्कळित झाले. त्याचा फटका मंगल कार्यालयांनाही बसला. त्यांची कार्यालयाची दुरुस्ती व स्वच्छतेची कामे सध्या सुरू आहेत. व्यवसाय सध्या बंद असला तरी दैनंदिन खर्च व कर्मचाऱ्यांचे वेतन सुरू असल्याचे त्यांनी सांगितले. आचारी काम करणारे व धार्मिक विधी करणारे किरकोळ कामांच्या शोधात आहेत.

कापड, किराणा व सराफ बाजारपेठेत ग्राहकांची खरेदीची वर्दळ बेताची आहे. सोने भावात काहीशी घसरण होऊनही ग्राहक बेताची खरेदी करत आहेत. भाजी मंडईत भाज्यांचा उठाव कमी आहे. लग्नाअभावी कांदा, बटाटा, फ्लॉवर, टोमॅटो, वांगी यांची मागणी घटली आहे.

विवाह मुहूर्त नसल्याने कामे नाहीत. तथापि, वादक कलाकारांना पथकात टिकवून ठेवण्यास त्यांना अंगावर उचल द्यावी लागत आहे.

जाधव बंधू, बँड व्यावसायिक, हजारमाची