नवी दिल्ली : हिंसाचार झालेल्या जहांगीरपुरी (Jahangirpuri Violence) येथे भाजपशासित महापालिकेकडून (Delhi Coporation) आज सकाळी साडेनऊ वाजतापासून बुलडोजर चालवले जात होते. येथील अतिक्रमणाविरोधात ही कारवाई असल्याचं महापालिकेकडून सांगण्यात आलं आहे. इथं कुठलीही हिंसा घडू नये यासाठी ४०० पोलिस तैनात करण्यात आले आहेत. अखेर सुप्रीम कोर्टाने तत्काळ आदेश दिल्यानंतर हे बांधकाम थांबवण्यात आलं आहे.

जहांगरीपुरीत हनुमान जयंतीच्या दिवशी हिंसाचार झाला होता. या भागात जमावबंदी लागू असतानाच आज महापालिकेने मोठी कारवाई केली. दिल्ली भाजपचे अध्यक्ष आदेश गुप्ता यांनीही महापौरांना पत्र लिहून जहांगीरपुरीतील बेकायदेशीर बांधकामे काढण्याची मागणी केली होती. या पत्राची एक प्रत महापालिका आय़ुक्तांनाही पाठवण्यात आली आहे. त्यानंतर भाजपशासित महापालिकेने या भागात आज सकाळी साडेनऊ वाजतापासून बुलडोजरने घरे पाडण्यास सुरुवात केली होती. या कारवाईवरून आपने भाजपवर जोरदार टीका केली. तसेच औवेसी यांनी देखील भाजपचा समाचार घेतला.

ओवैसींची टीका -

भाजपने गरिबांच्या विरोधात युद्ध पुकारले आहे, असे ओवैसी यांनी आपल्या ट्विटमध्ये म्हटले आहे. अवैध धंदे हटवण्याच्या नावाखाली हे लोक उत्तर प्रदेश, मध्य प्रदेश प्रमाणे दिल्लीतही गरीबांची घरे तोडत आहेत. या लोकांना नोटीसही देण्यात आली नाही. गरीब मुस्लिमांना शिक्षा दिली जात आहे. कारण त्यांनी जगण्याचे धाडस दाखवले आहे. या संपूर्ण प्रकरणावर अरविंद केजरीवाल यांनी आपली भूमिका स्पष्ट करावी, असं ओवैसी म्हणाले.

यासोबतच दिल्लीचे मुख्यमंत्री अरविंद केजरीवाल यांच्या सरकारचे पीडब्ल्यूडी विभाग या मोहिमेचा एक भाग आहे का? असा सवाल ओवैसी यांनी उपस्थित केला. जहांगीरपुरीच्या जनतेने त्यांना मतदान केले नाही का? ही कारवाई म्हणजे या लोकांचा विश्वासघात नाही का? हा सरकारचा भ्याडपणा आहे. पोलिस देखील गरीब जनतेच्या पाठिशी नाहीत, असंही ओवैसी म्हणाले.