कर्नाटकात टिपू सुलतानच्या पुतळ्यावरुन राजकारण चांगलंच तापलंय. काँग्रेस आमदाराविरुध्द भाजप आक्रमक झालेली पहायला मिळत आहे. यानंतर या वादात आता कर्नाटकचे माजी मुख्यमंत्री सिद्धरामय्या (Siddaramaiah) यांनी उडी घेतलीय.

टिपू सुलतानचा पुतळा (Tipu Sultan Statue) का बसवता येत नाही, असा सवाल सिद्धरामय्या (Siddaramaiah) यांनी केलाय. कर्नाटकातील काँग्रेस (Karnataka Congress) आमदार तन्वीर सैत (Tanveer Sait) यांनी टिपू सुलतानचा 100 फुटी पुतळा बसवणार असल्याचं जाहीर केलंय. मात्र, या प्रस्तावाला भाजपनं विरोध केलाय.

यावर सिद्धरामय्या म्हणाले, "टिपूचा पुतळा का बनवता येत नाही? त्यांना हा पुतळा बसवू द्यावा. भाजपनं आजपर्यंत इतिहासाचं विकृतीकरण केलं आहे. याआधीही भाजपनं नारायण गुरू, आंबेडकर आणि इतरांवरही टीका केली आहे. भाजप जनतेला खोट्या गोष्टी सांगून इतिहासाशी छेडछाड केली आहे, असा आरोप त्यांनी केलाय. दरम्यान, काँग्रेसचे आमदार तन्वीर सैत यांनी टिपू सुलतानचा 100 फुटी पुतळा बसवण्याची योजना आखली आहे. त्यानंतर भाजपनं टीका करायला सुरुवात केलीय. जो कोणी असं काम करेल, त्याला कायमचं घरी बसावं लागेल. कदाचित, आमदारकी किंवा विधानसभा सदस्यत्व गमावण्याचे संकेत भाजपनं (BJP) दिले आहेत. या प्रकरणी कर्नाटक विधानसभेतील विरोधी पक्षनेते सिद्धरामय्या यांनीही भाजपवर निशाणा साधायला सुरुवात केली आहे.