बंगळूर : माजी मंत्री व माजी सभापती डी. बी. चंद्रेगौडा (वय ८७) यांचे सोमवारी रात्री उशिरा त्यांच्या निवासस्थानी दरडहळ्ळी येथे निधन झाले. त्यांच्या (D. B. Chandregowda) मागे पत्नी आणि चार मुली असा परिवार आहे. आज, बुधवारी (ता. ८) त्यांच्यावर अंत्यसंस्कार करण्यात येणार आहेत.

त्यांचा जन्म २६ ऑगस्ट १९३६ रोजी झाला. त्यांना ‘डीबीसी’ म्हणून ओळखले जात होते. कायद्याची पदवी घेतल्यानंतर त्यांनी वकिली सुरू केली. १९७१ मध्ये त्यांनी काँग्रेसमध्ये प्रवेश केला. ते विधानसभा, विधान परिषद, लोकसभा आणि राज्यसभा सदस्य म्हणून निवडून आले.

इंदिरा गांधींच्या (Indira Gandhi) १९७७ मध्ये चिक्कमगळूरमधून लोकसभा मतदारसंघातून निवडणूक लढवण्यासाठी त्यांनी खासदारपदाचा राजीनामा दिला आणि त्यांच्या विजयासाठी काम केले. नंतर ते आमदार म्हणून निवडून आले आणि त्यांनी १९७९-८० पर्यंत पाटबंधारेमंत्री म्हणून काम केले. १९८०-८१ दरम्यान त्यांनी परिषदेत विरोधी पक्षनेते म्हणूनही काम केले होते.

चंद्रेगौडा यांनी नंतर जनता पक्षाकडून १९८३ मध्ये तीर्थहळ्ळी विधानसभा मतदारसंघातून विधानसभेवर निवडून आले. रामकृष्ण हेगडे यांच्या मुख्यमंत्रिपदाच्या कारकिर्दीत, त्यांनी विधानसभा अध्यक्ष म्हणून काम केले होते आणि १९८६ मध्ये जनता पक्षाकडून राज्यसभेवर निवडून आले. १९८७ मध्ये त्यांनी तीर्थहळ्ळी मतदारसंघातून कॉंग्रेसचे उमेदवार म्हणून दुसऱ्यांदा विजय मिळवला होता.

१९९९ ते २००४ दरम्यान कायदा आणि संसदीय कामकाज मंत्री म्हणून त्यांनी काम केले. चंद्रेगौडा यांनी २००९ मध्ये भाजपमध्ये प्रवेश केला आणि बंगळूर उत्तरमधून लोकसभेची जागा जिंकली. २०१४ पासून ते सक्रिय राजकारणापासून दूर होते.