लखनऊ : उत्तर प्रदेशातील गोरखनाथ मंदिरात तैनात असलेल्या सुरक्षा कर्मचार्‍यांवर हल्ला केल्याप्रकरणी अटकेतील आरोपी अहमद मुर्तझा अब्बासीचे इस्लामिक स्टेट ऑफ इराक अँड सीरिया (ISIS) या दहशतवादी संघटनेशी संबंध असल्याचे चौकशीदरम्यान उघड झाले आहे. एवढेच नव्हे तर, मुर्तझा अब्बासीने ISIS साठी लढण्याच्या उद्देशाने 2020 मध्ये शपथ घेतली होती, असेदेखील उत्तर प्रदेश पोलिसांनी सांगितले.

मुर्तझा अब्बासी सोशल मीडियाद्वारे आयएसआयएस दहशतवादी आणि प्रचार कार्यकर्ता मेहंदी मसूदच्या संपर्कात होता. मेहंदी मसूदला बंगळुरू पोलिसांनी 2014 मध्ये अटक केली होती. सोशल मीडियाच्या माध्यमातून मुर्तझा सतत परदेशातील आयएसआयएसच्या लढाऊ आणि समर्थकांच्या संपर्कात होता, असे यूपी पोलिसांनी सांगितले. चौकशीदरम्यान, मुर्तझाने सांगितले की, त्याने इंटरनेटवर एके-47, 5-4 कार्बाइनसह अनेक शस्त्रास्त्रांबद्दल लेख वाचले होते.

झाकिर नाईकचे व्हीडीओ बघायचा मुर्तजा अब्बासी

मुर्तजा हा वादग्रस्त झाकिर नाईकचे व्हिडीओ बघायचा. तो गोरखपुर येथील सिविल लाईनचा रहिवाशी असून, त्याने मुंबई २०१५ साली आयआयटीमधून केमिकल इंजिनियरिंग पूर्ण केलं. त्यानंतर दोन मोठ्या कंपन्यांमध्ये नोकरीही केली होती. २०१७ पासून तो मानसिकरित्या ठिक नसल्याचं त्याच्या कुटुंबियांनी सांगितलयं. त्याच्यावर अनेकवेळा उपचार केले गेल्याचं देखील उघड झालंय.