Amit Shah visit Karnataka : सध्या केंद्रीय गृहमंत्री अमित शहा कर्नाटक दौऱ्यावर आहेत. पुत्तूर इथं त्यांनी एका जाहीर सभेला संबोधित केलं. यावेळी शहांनी काँग्रेसवर जोरदार हल्ला चढवला.

अमित शहा म्हणाले, काँग्रेसनं (Congress) देशविरोधी पीएफआयच्या (PFI) 1700 सदस्यांची सुटका केली होती, परंतु पंतप्रधान नरेंद्र मोदी यांनी या संघटनेवर बंदी घातली. देशद्रोही घटकांना बळ देणारा काँग्रेस पक्ष कधीही कर्नाटकचं रक्षण करू शकत नाही, असं त्यांनी ठामपणे सांगितलं.

शहा पुढं म्हणाले, तुमच्या जवळचं राज्य केरळ आहे. मला फार काही बोलायचं नाहीये. कर्नाटक सुरक्षित ठेवायचं असेल तर ते फक्त भाजपच करू शकतं. काँग्रेस आणि जेडीएस (JDS) 18 व्या शतकातील म्हैसूरचे शासक टिपू सुलतान यांच्यावर विश्वास ठेवतात आणि दोन्ही पक्ष कर्नाटकसाठी काहीही चांगले करू शकत नाहीत, असंही त्यांनी सांगितलं.

अमित शाह पुत्तूरमधील सेंट्रल अरेकनट आणि कोको मार्केटिंग अॅण्ड प्रोसेसिंग को-ऑपरेटिव्ह लिमिटेड (Central Arecanut and Cocoa Marketing and Processing Cooperative Limited CAMPCO) च्या सुवर्ण महोत्सवी सोहळ्यासाठी कर्नाटकात आले होते. यावेळी त्यांनी काँग्रेसवर जोरदार हल्लाबोल केला.

भाजपमुळं कर्नाटक समृद्ध - अमित शहा

काँग्रेस आणि जेडीएस कर्नाटकचं काहीही भलं करणार नाहीत. कर्नाटकात जेव्हा-जेव्हा भाजपचं सरकार होतं, तेव्हा ते समृद्ध होतं. देशभरातील शेतकरी माजी मुख्यमंत्री बीएस येडियुरप्पा यांची आठवण काढतात. कारण, त्यांनी शेतकऱ्यांना समृद्ध केलं. याशिवाय, येडियुरप्पांनी त्यांच्या नेतृत्वाखाली बेंगळुरूचा देखील विकास केलाय, असंही शहा म्हणाले.