अंडरवर्ल्ड डॉन दाऊद इब्राहिमचा (Dawood Ibrahim) भाऊ इकबाल कासकार याला ईडीने (ED) ताब्यात घेतलं आहे. यानंतर ईडीने त्याला विशेष पीएमएलए (PMLA) न्यायालयात हजर केलं. PLMA कोर्टाने इक्बाल कासकरला ७ दिवसाची म्हणजेच २५ फेब्रुवारीपर्यंत ईडी कोठडी दिली आहे.

इक्बालचे वकिल सुलतान खान यांनी इक्बाल हा अनेक आजारांनी त्रस्त असून कस्टडीत त्यांना वैद्यकिय औषध आणि घरचं जेवण देण्यात यावे. अशी मागणी केली. न्यायालयाने त्याला परवानगी दिली. दरम्यान न्यायाधीशांनी त्याला प्रश्न विचारले. सत्र न्यायाधीश एम जी देशपांडे यांनी इकबाल कासकरला (Iqbal Kaskar) त्याचं नाव विचारल्यानंतर ईडीच्या कस्टडीत काही प्रॉब्लेम आहे का असा प्रश्न विचारला. यावेळी इकबाल कासकरने नाही असं उत्तर दिलं.

ईडीने (ED) दाऊद इब्राहिमचा भाऊ इकबाल कासकर याची चौकशी करण्याची परवानगी देण्यासाठी न्यायालयात याचिका दाखल केली होती. इक्बाल कासकरला ठाणे पोलिसांनी 2017 मध्ये खंडणी प्रकरणी अटक केली होती. काही वर्षांपूर्वी ठाणे पोलिसांनी इकबाल कासकर आणि अनीस इब्राहिम आणि इतरांविरुद्ध रिकव्हरी प्रकरणात गुन्हा दाखल केला होता ज्यांची कागदपत्रे ईडीने ताब्यात घेतलं आहे. त्यानंतर इकबाल कासकरला ईडीने ताब्यात घेतले

दाऊद इब्राहिम मनी लॉन्ड्रिंग (Money laundering) प्रकरणात ईडीने आतापर्यंत 6 जणांचे जबाब नोंदवले आहेत. याच प्रकरणी ईडीने 2 बिल्डरांना समन्स पाठवले असून, त्यांचे जबाबही नोंदवले जाणार आहे.