गोकाक : येथून जवळच शिवापूर-सावळगी रस्त्यावर मोटारसायकल वरून घरी जाताना रात्री (ता. ९) नऊच्या सुमारास अज्ञातांनी मोटारसायकल अडवून तरुणाचा खून केला. शिवशंकर शिवपुत्र मगदूम (वय ३४, मुतनाळ-सावळगी) याचा मारेकऱ्यांनी गळा चिरून शिर धडावेगळे करून निर्घृण खून केला.

गोकाक ग्रामीण पोलिसांतून (Gokak Rural Police) व घटना स्थळावरून मिळालेल्या माहितीनुसार शिवशंकर बेळगाव येथील रिलायन्स मॉलमध्ये दोन महिन्यांपासून कामाला होता. काल सायंकाळी काम संपवून बेळगावहून रेल्वेने गोकाक येथे आला.

रात्री सव्वाआठच्या सुमारास येऊन रेल्वे स्थानकासमोर लावलेली मोटारसायकल घेऊन मुतनाळला (सावळगी) आपल्या गावी जाताना शिवापूर-सावळगी रस्त्यालगत मड्डी शिवप्पन मंदिरासमोर रस्त्यावर काहीजणांनी त्याची मोटारसायकल अडवून ढकलून देऊन शिवशंकर यास पकडून याचे शिर धडावेगळे करून फरारी झाले.

याबाबत त्याचे वडील शिवपुत्र शिवालिंग मुतनाळ यांनी गोकाक ग्रामीण पोलिसांत अज्ञातांविरोधात फिर्याद दिली. डीएसपी मुल्ला याच्या मार्गदर्शनाखाली पोलिस निरीक्षक गोपाळ राठोड, उपनिरीक्षक किरण मोहिते अधिक तपास करीत आहेत. आज बेळगाव जिल्हा अतिरिक्त पोलिसप्रमुख वेणूगोपाल यांनी घटनास्थळी भेट देऊन पाहणी करून गोकाक ग्रामीण पोलिसांना तपासाबाबत मार्गदर्शन केले. दरम्यान, या घटना घडून २४ तासानंतरही खुनाचे कारण पोलिसांना समजू शकलेले नाही.