मुझफ्फरपुर : मास्टर ब्लास्टर सचिन तेंडुलकरचे (Sachin Tendulkar) जगभरात अनेक चाहते आहेत. मात्र सचिन तेंडुलकरचा मोठा चाहता म्हणून सुधीर कुमारला ओळखल जाते. याच सुधीरला बिहार पोलीसांनी मारहाण केल्याची धक्कादायक घटना समोर आली आहे.

बिहारच्या मुझफ्फरपुर जिल्ह्यातील टाऊन पोलीस स्टेशनमध्ये एका पोलीस कर्मचाऱ्याने सुधीर कुमारला (Sudhir Kumar) शिवीगाळ आणि मारहाण केली. गुरवारला सुधीरचा चुलत भाऊ किशन कुमारला टाऊन पोलीस स्टेशन येथील पोलीसांनी ताब्यात घेतले होते. जेव्हा सुधीरला हा संपुर्ण प्रकार कळला, तेव्हा त्याने पोलीस स्टेशन गाठले. मात्र प्रकरण काय आहे, याविषयी त्याला कल्पना नव्हती. पोलीसांनी सुधीरचा चुलत भाऊ किशन कुमारला लॉकअपमध्ये बंद केले होते. हे पाहून सुधीर कुमार सरळ किशनकडे गेला आणि त्याच्याशी बोलू लागला. एका पोलीस कर्मचाऱ्याच्या हे निदर्शनास येताच त्याने सुधीरला शिवीगाळ करण्यास सुरवात केली. सुधीरने यावर विरोध करताच पोलीस कर्मचाऱ्याने सुधीरला मारहाण करत पोलीस स्टेशनमधून हाकलून लावले. विशेष म्हणजे याच टाऊन पोलीस स्टेशनचे सुधीर कुमारच्या हस्ते उद्घाटन झाले होते.

या प्रकरणावरून सुधीर कुमारने पोलीस उपअधीक्षक रामनरेश पासवान यांच्याकडे तक्रार केली. यावर पोलीस उपअधीक्षक यांनी सुधीरला या संदर्भात कारवाई करण्याचे आश्वासन दिले आहे.