नवी दिल्ली : श्रद्धा वाळकर हत्या प्रकरणाबाबत आता राजकारण तापलं आहे. यावर आता ऑल इंडिया मजलिस-ए-इत्तेहादुल मुस्लिमीनचे (एआयएमआयएम) प्रमुख असदुद्दीन ओवेसी यांची प्रतिक्रिया आली आहे. ओेवेसी यांनी गुरुवारी श्रद्धा मर्डर केसवरून सुरू असलेल्या राजकारणावरून भारतीय जनता पक्षावर (भाजप) जोरदार टीका केली. (Shraddha Murder Case news in Marathi)

या मुद्द्यावरून भारतीय जनता पक्षाकडून सुरू असलेलं राजकारण पूर्णपणे चुकीचं आहे, असं ओवेसी म्हणाले. "श्रद्धा हत्या प्रकरण लव्ह जिहादचे प्रकरण नाही. ही महिला अत्याचाराची घटना आहे. त्यामुळे त्याकडे त्याच दृष्टीने पाहायला हवं. या घटनेचा आम्ही निषेध केला आहे. ओेवेसी पुढं म्हणाले की, देशातील पुरुषांना महिलांवर अत्याचार करण्याचा आजार झाला आहे. पुरुषांच्या या आजारावर उपचार व्हायला हवेत.

दिल्लीतील निवडणूक प्रचारादरम्यान आसामचे मुख्यमंत्री हिमंता बिस्वा सरमा यांनी या घटनेला धार्मिक रंग दिल्याचा टोलाही ओवेसी यांनी लगावला. याआधी 20 नोव्हेंबर रोजी आसामचे मुख्यमंत्री सरमा यांनी भारताला समान नागरी कायदा आणि 'लव्ह जिहाद'विरोधात कायदा करण्याची गरज असल्याचं म्हटलं होतं. तसेच भारताला आफताब (श्रद्धा हत्येतील आरोपी) सारख्या व्यक्तीची गरज नसून, पंतप्रधान नरेंद्र मोदींसारख्या नेत्याची गरज असल्याचं बिस्वा यांनी म्हटलं होतं.

यावेळी ओवेसी यांनी आझमगडच्या घटनेचा उल्लेख करत म्हटलं की, आरोपीने आपल्या पत्नीची हत्या केली. त्यानंतर मृतदेह सुटकेसमध्ये बंद करून बाहेर फेकला. अशा घटना दुःखद आहेत, त्यांचे राजकारण केले जाऊ नये आणि त्याकडे हिंदू-मुस्लिम दृष्टीकोनातून पाहिले जाऊ नये, असं आवाहनही ओवेसी यांनी केलं.