पंजाबमधील (Punjab) होशियारपूर (Hoshiarpur) येथील गदरीवाला गावात बोअरवेलमध्ये (Borewell) पडून सहा वर्षांच्या मुलाचा मृत्यू झालाय. भटक्या कुत्र्यापासून वाचण्याचा प्रयत्न करत असताना त्याचा पाय घसरून तो बोअरवेलमध्ये पडला. घटनास्थळी तातडीनं बचावकार्य सुरू करण्यात आलं. दरम्यान, बालकाला ऑक्सिजन पोहोचवून उत्खनन सुरू करण्यात आलं. बऱ्याच प्रयत्नांनंतर मुलाला बाहेर काढून रुग्णालयात दाखल केलं असता, त्याचा मृत्यू झालाय.

ही घटना होशियारपूर जिल्हा मुख्यालयापासून 25 किमी अंतरावर आहे. इथं 6 वर्षीय ऋतिक सुमारे 300 फूट खोल बोअरवेलमध्ये पडला होता. सुमारे 95 फूट खाली गेल्यानंतर चिमुरडा अडकला. याची माहिती मिळताच, बालकाला वाचवण्यासाठी बचावकार्य सुरू करण्यात आलं. बोअरवेलपर्यंत जाण्यासाठी बोगदा खोदण्यासाठी जेसीबी मशीनही तैनात करण्यात आलं होतं.

पंजाबमधील होशियारपूरमध्ये एक बोअरवेल उघडली होती, तेव्हा एका भटक्या कुत्र्यानं तेथून जाणाऱ्या मुलाचा चावा घेण्याचा प्रयत्न केला. चिमुरडा स्वत:ला वाचवण्याच्या प्रयत्नात धावत असतानाच त्याचा तोल सुटला आणि तो उघड्या बोअरवेलमध्ये पडला. यानंतर माहिती मिळताच बचावकार्यासाठी लष्कराला पाचारण करण्यात आलं. प्रशासनाचे अधिकारीही घटनास्थळी पोहोचले होते.

स्थानिक अधिकाऱ्यांनी सांगितलं की, 'रविवारी सकाळी 9 वाजता मुलगा बोअरवेलमध्ये पडला होता. बचाव कार्यादरम्यान मुलाला ऑक्सिजन देण्यात आलं. याचवेळी मशिनद्वारे उत्खनन सुरू करण्यात आलं. चिमुरडा 95 फूटांवर अडकला होता. मुलाला बाहेर काढण्यासाठी पाईपचाही वापर करण्यात आला होता. दरम्यान, ऋतिकला बाहेर काढलं तेव्हा तो बेशुद्ध अवस्थेत होता.'