India’s First Reaction on Trump–Putin Meeting : भारताने अलास्कामध्ये अमेरिकेचे अध्यक्ष डोनाल्ड ट्रम्प आणि व्लादिमीर पुतीन यांच्यातील शिखर परिषदेचे स्वागत केले आहे. भारतीय परराष्ट्र मंत्रालयाने एक अधिकृत निवेदन जारी करून म्हटले आहे, की जगाला युद्ध लवकरात लवकर संपवायचे आहे.

परराष्ट्र मंत्रालयाचे प्रवक्ते रणधीर जयस्वाल म्हणाले, "अलास्कामध्ये अमेरिकेचे अध्यक्ष डोनाल्ड ट्रम्प आणि रशियाचे अध्यक्ष व्लादिमीर पुतीन यांच्यातील शिखर परिषदेचे भारत स्वागत करतो. शांततेसाठी त्यांचे नेतृत्व कौतुकास्पद आहे. शिखर परिषदेत झालेल्या प्रगतीचे भारत कौतुक करतो." तसेच ते म्हणाले की,  संवाद आणि राजनैतिकतेद्वारेच पुढे जाण्याचा मार्ग शोधता येतो.

ट्रम्प आणि पुतीन यांच्यात सुमारे तीन तास चाललेल्या बैठकीनंतर दोन्ही नेत्यांनी एक संक्षिप्त संयुक्त पत्रकार परिषद घेतली. कोणताही करार जाहीर करण्यात आला नाही आणि कोणत्याही नेत्याने प्रश्नांची उत्तरे दिली नाहीत.

ट्रम्प यांनी ही चर्चा अतिशय उपयुक्त असल्याचे वर्णन केले. रशियाकडून तेल खरेदी करण्यासाठी अमेरिकेने अलीकडेच भारतावर २५ टक्के अतिरिक्त कर लादला आहे. पुतीन यांच्याशी झालेल्या भेटीपूर्वी ट्रम्प यांनी दावा केला होता की, भारतावर अतिरिक्त २५ टक्के कर लावल्यामुळे रशियाने एक प्रमुख तेल ग्राहक गमावला आहे.

अलास्का येथील बैठकीनंतर ट्रम्प म्हणाले, "मला आशा आहे की आम्ही ज्या करारावर पोहोचलो आहोत तो आम्हाला त्या ध्येयाच्या  जवळ जाण्यास मदत करेल आणि युक्रेनमध्ये शांततेचा मार्ग मोकळा करेल. मला वाटते की आमची बैठक खूप उपयुक्त होती. असे अनेक मुद्दे होते ज्यांवर आम्ही सहमत झालो होतो."