रत्नागिरी : तालुक्यातील काळबादेवी येथील विक्रम विलास मयेकर यांनी घरी बैलगाडी (Bullockcart) चालवणारा गणपती बाप्पा (Konkan Ganeshotsav) प्रतिष्ठापित केला आहे. बैलगाडीवान गणपती पाहण्यासाठी अनेक भाविक येत आहेत. यंदा अनेक ठिकाणी चांद्रयानाची प्रतिकृतीही साकारण्यात आली आहे.

यासंदर्भात त्यांच्याशी संपर्क साधला असता ते म्हणाले, आम्ही शेतकरी (Farmer) आहोत. त्यामुळे यंदा प्रथमच बैलगाडी चालवणारा बाप्पा साकारण्याचे ठरवले. गावातीलच मूर्तिकार सागर मुरलीधर चौगुले यांनी ही मूर्ती सुरेख साकारली. आधी बैलगाडी बनवली. त्यासाठी लोखंडी रॉड वगैरे साहित्य वापरले आहे. त्यानंतर त्यावर मातीकाम केले आहे. त्यावर बाप्पाची मूर्ती असल्यामुळे काळजी घेतली आहे.

गणेशोत्सवासाठी सर्वच घरांमध्ये बाप्पासाठी नवनवीन कल्पना वापरून सजावट केली जाते. स्वतः बनवलेले पडदे, बाजारातील विद्युत रोषणाईचे साहित्य, गावात मिळणारे कवंडल फळे, फुले, पाने यांची सजावट केली जाते. त्यासोबतच बाप्पाच्या मूर्तीसुद्धा नवनवीन प्रकारच्या बनवण्याकडे कल दिसतो.

बसलेल्या बाप्पाच्या मूर्तीसह गरुड, मयुर, राजहंस यांच्यावर आरुढ मूर्ती असतात. सोशल मीडियाच्या प्रभावामुळे विविध ठिकाणच्या मूर्ती पाहायला मिळतात. आपल्या आवडीच्या मूर्ती निश्चित करून त्या तशाच मूर्ती हव्यात असे मूर्तीकारांना सांगितले जाते. यंदा अनेक ठिकाणी चांद्रयानाची प्रतिकृतीही साकारण्यात आली आहे. विविध स्पर्धांसाठी देखावे साकारण्यावर भाविकांचा कल दिसतो.