न्यूयॉर्क : 'टाइम मासिका'च्या 'पर्सन ऑफ द इअर'चा बहुमान यंदा हवामान बदलांच्या विरोधात काम करणाऱ्या स्वीडनच्या ग्रेटा थनबर्ग हिला मिळाला आहे. ग्रेटा ही अवघ्या 16 वर्षांची असून, हा बहुमान मिळालेली ती आजवरची सर्वांत तरुण व्यक्ती ठरली आहे.
शालेय विद्यार्थिनी असलेल्या ग्रेटाने हवामान बदलांच्या विरोधात जागृतीसाठी मोहीम सुरू केली असून, जगभरातील विद्यार्थ्यांसाठी ती प्रेरणास्थान ठरली आहे.
टाइम मासिकाकडून पर्सन ऑफ द इअर म्हणून ग्रेटाच्या नावाची आज घोषणा करण्यात आली. ग्रेटाने आजच माद्रिदमध्ये सुरू असलेल्या संयुक्त राष्ट्रांनी (यूएन) आयोजित केलेल्या हवामानबदल परिषदेत जागतिक प्रतिनिधींसमोर भाषण केले. पुढील दशक पृथ्वीचे भविष्य निश्चित करणारे असेल याची आठवण ग्रेटाने आपल्या भाषणातून जागतिक नेत्यांना या वेळी करून दिली.
ग्रेटाने मागील वर्षी हवामान बदलांबद्दलच्या जागृती मोहिमेला सुरवात केली होती. स्वीडनच्या संसदेसमोर दर शुक्रवारी ती निदर्शने करत होती. ग्रेटाच्या या कृत्याची जागतिक पातळीवर दखल घेण्यात आली. त्यानंतर ग्रेटाच्या मोहिमेला आंतरराष्ट्रीय स्वरूप आले. त्या वेळी #फ्रायडेफॉरफ्युचर असा हॅशटॅग वापरून जगभरातील लहान-थोरांनी ग्रेटाला आपला पाठिंबा दर्शविला होता. त्यानंतर हवामानबदलांबाबत जागतिक पातळीवरील आवाज म्हणून ग्रेटाकडे पाहिले जाऊ लागले. ग्रेटाच्या मोहिमेत जगभरातील लाखो विद्यार्थ्यांनी सहभाग नोंदविला आहे.
चालू वर्षाच्या सुरवातीला ग्रेटाची शिफारस शांततेच्या नोबेल पारितोषिकासाठी करण्यात आली होती. जगप्रसिद्ध टाइम मासिकाद्वारे 1927 पासून पर्सन ऑफ द इअर निवडण्यात येतो.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.