जिनिव्हा : कोरोना विषाणूचा जागतिक प्रसार अजूनही वेगाने होत असून, या महामारीचे दुष्परिणाम पुढील दशकांपर्यंत जाणवणार असल्याचे जागतिक आरोग्य संघटनेचे (डब्लूएचओ) प्रमुख टेड्रोस गेब्रेएसेस यांनी आज म्हटले आहे. दुबई येथील आरोग्य परिषदेत व्हिडीओ कॉन्फरन्सच्या माध्यमातून बोलताना टेड्रोस गेब्रेएसेस यांनी या महामारीला नियंत्रणात आणण्यासाठी सर्व राष्ट्रांनी मिळून एकत्र येत प्रयत्न करणे गरजेचे असल्याचे म्हटले आहे. शिवाय सध्याच्या परिस्थितीत हा विषाणू अधिकच वाढत असल्याचे टेड्रोस गेब्रेएसेस यांनी यावेळी सांगितले. 

कोरोनावर डब्लूएचओचा मोठा इशारा  

डब्लूएचओचे प्रमुख टेड्रोस गेब्रेएसेस यांनी आज व्हर्च्युअल कॉन्फरन्स दरम्यान, जोपर्यंत विभागलेले जग अस्तित्वात आहे तोपर्यंत कोरोनाच्या महामारीला रोखता येणे कठीण असल्याचे म्हटले आहे. सर्व जगभर पसरलेल्या या विषाणूचा पराभव करण्यासाठी सर्व राष्ट्रांनी एकत्र येणे गरजेचे असल्याचे टेड्रोस गेब्रेएसेस यांनी म्हटले असून, सध्याच्या स्थितीला कोरोना विषाणू हा जगातील सर्वात मोठा धोका नाही तर, या विषाणूसोबतच जगातील एकता आणि जागतिक नेतृत्वाचा अभाव या गोष्टी असल्याचे त्यांनी अधोरेखित केले. कोरोना महामारीच्या पार्श्वभूमीवर लॉकडाउनमुळे सर्वच देशांच्या अर्थव्यवस्थेचे मोठे नुकसान झाले आहे. मात्र सध्याचे संकट हे फक्त आरोग्य संदर्भात संकट नसून, आर्थिक, सामाजिक आणि काही देशांमध्ये राजकीय संकट असल्याचे टेड्रोस गेब्रेएसेस यांनी म्हटले आहे. याव्यतिरिक्त टेड्रोस गेब्रेएसेस यांनी सर्वच क्षेत्रात कोरोनामुळे झालेले नुकसान मोठे असल्याचे सांगत, याचे परिणाम जगात अनेक पुढील दशकांपर्यंत राहणार असल्याचे मत व्यक्त केले.      

बॉयकॉट चायनीज प्रॉडक्ट मोहिमेचं चीनला मिरच्या झोंबल्या; वाचा चीनचा ग्लोबल टाईम्स काय म्हणतोय...

तसेच, याअगोदर डब्लूएचओने कोरोनाच्या विषाणूची पुढची लाट येण्याची शक्यता वर्तविली होती. याचा पुनरुच्चार टेड्रोस गेब्रेएसेस यांनी केला आहे. कोरोनाच्या खबरदारीसाठी केलेल्या लॉकडाउनमुळे सर्वच देशांची आर्थिक परिस्थिती कमालीची ढासळली होती. त्यानंतर काही देशांनी लॉकडाउन हटविण्याचा किंवा लॉकडाउनचे काही नियम शिथिल करण्याचा निर्णय घेतला होता. त्यामुळे हा निर्णय महागात पडू शकण्याची भीती यापूर्वी जागतिक आरोग्य संघटनेने व्यक्त केली होती. संपूर्ण जगभरात कोरोना पॉझिटिव्ह रुग्णांची संख्या जवळ जवळ ९० लाखांवर पोहचली असून, या विषाणूच्या संसर्गाने ४ लाख ६८ हजार ८८१ जणांचा जीव घेतला आहे. त्यामुळे अजूनतरी कोरोना विषाणूचा अटकाव करता येऊ शकत नसल्याने लॉकडाउन हटविणे जोखमीचे असल्याचे जागतिक आरोग्य संघटनेने म्हटले होते.