गुरुवारी रात्री रशियाच्या (Russia) संभाव्य आक्रमणाविरुद्ध स्वतंत्र (Independent) आणि लोकशाहीवादी (Democratic) युक्रेनच्या (Ukraine) समर्थनासाठी अमेरिकेच्या सिनेटने एक ठराव मंजूर केलाय. युक्रेनचे संरक्षण बळकट करण्यासाठी आणि सुरक्षा मदत देण्यासाठी राजकीय आणि लष्करी सहाय्य देऊन युक्रेनला पाठिंबा देण्याचे या ठरावात म्हटले आहे

युक्रेनवर आक्रमण झाल्यास युरोपमधील शांतता प्रस्थापीत करण्यासाठी रशियाला महत्त्वपूर्ण किंमत मोजावी लागेल, असे अमेरिकेचे अध्यक्ष जो बायडेन (Joe Biden) यांनी या ठरावात म्हटले आहे. ब्रिटन आणि अमेरिकेनं रशियाकडे त्यांनी सैन्य मागे घेतल्याचे पुरावे देण्यास सांगितलं आहे. तर एका बाजुला रशियाने पूल उभारल्याचे फोटोही समोर आले आहेत.

अमेरिकेचे राष्ट्राध्यक्ष जो बायडन यांनी या साऱ्या प्रकरणावर आपलं मत मांडलं आहे. त्यांनी म्हटलंय की, रशियाकडून युक्रेनवर 'पुढील काही दिवसांत' हल्ला होणं शक्य आहे. मात्र, पुतीन यांना फोन करण्याची सध्यातरी 'कोणतीही योजना नाही', असं जो बायडेन यांनी म्हटलंय. तर रशिया सैन्य माघारी घेत असल्याचा कोणताही पुरावा अद्याप दिसत नसल्याने आपण त्यांच्यावर विश्‍वास ठेवण्याची घाई करू नये, असे आवाहन ब्रिटनच्या परराष्ट्र मंत्री लिझ ट्रस यांनी आज केले. अमेरिकेनेही आज पुन्हा एकदा रशियाकडून आक्रमण होण्याचा धोका व्यक्त केला आहे.

रशिया आणि युक्रेन यांच्यात तणावाचं वातावऱण आहे. यामुळे जगातील अनेक देशांची चिंता वाढली आहे. अमेरिकेसह अनेक देशांनी रशिया-युक्रेन यांच्यात युद्धाची ठिणगी पेटल्यास त्याचे परिणाम भयंकर असतील असं म्हटलं आहे.