मुंबई : घरातील भांडण-तंटे, घराबाहेरची गर्दी, अभ्यासाची चिंता, ऑफीसमधल्या कामाची चिंता, मनाविरूद्ध होणाऱ्या गोष्टी, आर्थिक अडचणी, अशी एक ना अनेक कारणे आहेत आपल्याकडे दु:खी राहण्यासाठी.

अशा स्थितीत काही चांगल्या गोष्टी घडल्याच तरी त्याचा पूर्ण आनंद घेता येत नाही. इतरांचं हसतं-खेळतं आयुष्य पाहून प्रश्न पडतो 'आनंदी राहायचं तरी कसं ?' या प्रश्नाचं उत्तर आज जाणून घेऊ. हेही वाचा - भारतीयांनी जगाला डिजिटल पेमेंट शिकवायची आलीये वेळ...

• रोज शारीरिक व्यायाम करा. यामुळे तुमचे शरीर सुदृढ राहील व तुम्हाला दु:खी करणारी आजारपणे उद्भवणार नाहीत. त्यासोबतच ध्यानधारणा करा जेणेकरून तुमचे विचार नियंत्रित होतील व मन शांत राहील.

• आनंद झाल्यावर मोकळेपणाने हसा. कोणाला भेटल्यावरही चेहऱ्यावर स्मितहास्य असू द्या. आनंदी चेहरा तुमच्या व्यक्तिमत्त्वाला उठाव देतो.

• पुरेशी झोप घ्या. प्रौढ व्यक्तिला किमान ७ तासांची झोप आवश्यक असते.

• हिरव्या भाज्या, फळे आणि कडधान्ये यांचा तुमच्या रोजच्या आहारात समावेश केल्यास शरीराला भरपूर पोषक तत्त्वे मिळतील जेणेकरून तुम्हाला आनंदी ठेवणारी संप्रेरके नियंत्रणात राहतील.

• रोज प्राणायम करा आणि श्वासावर लक्ष केंद्रित करा. पूर्ण श्वास घ्या आणि पूर्ण श्वास बाहेर सोडा.

• तुमचा आनंद हिरावून घेणाऱ्या प्रसंगांकडे सकारात्मक दृष्टीने बघा. त्यामागील कारणे शोधा आणि पुन्हा ती गोष्ट घडणार नाही याची काळजी घ्या.

• दिवसातून थोडं तरी वाचन करण्याची सवय स्वत:ला लावून घ्या. वाचनामुळे तुमची एकाग्रता वाढेल. विचार स्पष्ट होतील. शब्दसंपदा वाढेल. यामुळे तुम्ही तुमची बाजू, मतं इतरांना चांगल्या प्रकारे पटवून देऊ शकाल. परिणामी अनेक गोष्टी तुमच्या मनाप्रमाणे होऊ शकतील.

• महिन्यातून एकदा तरी निसर्गरम्य ठिकाणी फिरायला जा. यामुळे मन प्रसन्न राहील आणि इतरांशी मैत्रीही होईल.

• हे सगळं एकाएकी जमणार नाही. त्यासाठी सोपी आणि अल्पकालीन ध्येये निश्चित करा. उदा. एखादं पुस्तक धडाधडा वाचत सुटू नका. रोज एक किंवा दोनच पानांचं ध्येय निश्चित करा. हळूहळू वाचन वाढेल.