जळगाव : लहान मुलीला भेटण्यासाठी मोठ्या मुलीसोबत निघालेल्या दुचाकीस्वार पित्याला भरधाव ट्रकने जळगाव तालुक्यातील रामदेववाडी गावाजवळ चिरडल्याची दुदैवी घटना शनिवारी (ता. ३१) दुपारी साडेबाराच्या सुमारास घडली.

शासकीय वैद्यकीय महाविद्यालयात मृतदेह आणण्यात आला असून, नातेवाईकांनी मोठी गर्दी केली होती. एमआयडीसी पोलिस ठाण्यात अकस्मात मृत्यूची नोंद करण्यात आली आहे. राजू दीपक कोळी (वय ४५, रा. चारठाणा, ता. मुक्ताईनगर) असे मृत व्यक्तीचे नाव आहे.

नातेवाईकांनी दिलेल्या माहितीनुसार, चारठाणा (मुक्ताईनगर) येथे राजू कोळी कुटुंबासह वास्तव्याला होते. शेतीकाम करून उदरनिर्वाह करत होते. भडगाव येथील लहान मुलीला भेटण्यासाठी राजू कोळी दुचाकीने जळगावहून निघाले. (Accident News truck attack on two wheeler dad death daughter injured Jalgaon news)

हेही वाचा : जोखमीचे भान राखूनच करा SIP मध्ये गुंतवणूक

दुपारी साडेबाराच्या सुमारास शिरसोली गावापुढील रामदेववाडी गावाजवळच समोरून भरधाव येणाऱ्या वाहनाने त्यांच्या दुचाकीला जोरदार धडक दिली. या अपघातात राजू कोळी यांच्या डोक्यावरून ट्रकचे चाक गेल्याने त्यांचा जागीच मृत्यू झाला. तर मागे बसलेली मोठी मुलगी सोनी कोळी ही गंभीर जखमी झाली आहे. अपघातानंतर घटनास्थळी ग्रामस्थांची गर्दी झाली होती.

एमआयडीसी पोलिस ठाण्यातील पोलिस कर्मचारी स्वप्नील पाटील, हेमंत पाटील यांनी घटनास्थळी धाव घेऊन ग्रामस्थांच्या मदतीने मृतदेह शववाहिकेतून जिल्हा रुग्णालयात पाठविले. तर जखमीस तातडीने खासगी रुग्णालयात उपचारार्थ दाखल करण्यात आले. याप्रसंगी शासकीय वैद्यकीय महाविद्यालयात नातेवाईकांनी मन हेलवणारा आक्रोश केला होता. याप्रकरणी एमआयडीसी पोलिसांत अकस्मात मृत्यूची नोंद करण्यात आली आहे.