Jalgaon Rain News : महिनाभर वाट बघायला लावलेल्या पावसाचे गुरुवारपासून जिल्ह्यात दमदार आगमन झाल्याने शेतकरी आनंदीत झाला आहे. पण खरिपाची पिके हाताबाहेर गेल्याने या पावसाचा त्यांना काहीच फायदा होणार नाही. (heavy rain weather update jalgaon news)

गेल्या २४ तासांत पारोळा, भडगाव, अमळनेरला अतिवृष्टीची नोंद झाली आहे. त्याबरोबर जळगाव शहरासह तालुका, भुसावळ, यावल , रावेर, मुक्ताईनगर, चोपडा, एरंडोल, चाळीसगाव, जामनेर, पाचोरा, धरणगाव, बोदवड अशा सर्वच ठिकाणी कमी अधिक प्रमाणात एकूण सरासरी ३६.९ मिलिमीटर पाऊस झाला आहे.

गेल्या अठरा दिवसांपासून तालुक्यात पावसाने डोळे वटारल्याने पिण्याच्या पाण्यासह पिकांची परिस्थिती दयनीय झाली होती. किंबहुना अनेक शेतकऱ्यांनी आपल्या शेतातील उभे पीक नांगर फिरवून आपली व्यथा व्यक्त केली.

हेही वाचा : Credit Card फसवणूक....काय घ्याल काळजी?

तर शेतकऱ्यांचे नगदी पीक म्हणून ओळखले जाणार्या कपाशीची वाढ खुंटून ते करपू सुकू लागल्यामुळे तालुक्याला कोरडा दुष्काळ जाहीर व्हावा, यासाठी राष्ट्रवादी काँग्रेस रस्त्यावर आली. दरम्यान, ७ नोव्हेंबरला गोकुळाष्टमीच्या दिवशी वरूणराजाने पावसाची हंडी फोडत शेतकऱ्यांच्या आशा पल्लवीत केल्या.

तालुक्यातील पारोळा शहर, बहादरपूर परिसरातील काही भाग तसेच इतर ठिकाणी काहीसा समाधानकारक पाऊस पडला. त्यामुळे शेतकऱ्यांनी जोरदार पावसाची अपेक्षा व्यक्त केली असून लवकरच तामसवाडी तालुका पारोळा येथील बोरी धरण भरावे, अशी वरूण राजा चरणी प्रार्थना केली आहे.