जळगाव : शहरातील दंगलग्रस्त कॉलनीत गुरुवारी (ता. ५) दोन गटांत तुंबळ हाणामारी होऊन शस्त्रांचा सर्रास वापर करून एकाला गंभीर जखमी करण्यात आले. गुन्हा घडल्यानंतर पोलिस आले, दोन्ही गटांची परस्पर विरुद्ध तक्रार दाखल करण्यात आली.

तक्रार दाखल करण्यासाठी आलेले तक्रारदारच संशयित असल्याने तक्रार देऊन त्यांनी अलगद पळ काढला. फरारी संशयितांचा शोध सुरू असल्याचे पोलिसांनी सांगितले. (Suspect escapes from police station Jalgaon Crime News)

जिल्‍हापेठ पोलिस ठाण्याच्या हद्दीतील दंगलग्रस्त कॉलनीत वाहन घरासमोर का लावले, या करणावरून वादला सुरवात होऊन लोखंडी रॉड, लाठ्या काठ्यांसह तलवार-चॉपरसह हाणामारी झाली.

या हाणामारीत रईस हमीद खाटीक ऊर्फ रईस लाला याच्या डोक्यावर, हातावर, पाठीवर लोखंडी रॉडसह चाकूने हल्ला झाला. जखमी तरुणाला जिल्‍हा रुग्णालयात दाखल करण्यात आले. तेथे पोलिसांनी जबाब घेतल्यावर आदीलखान, शेख अकबर, साजीद खान या तिघांविरुद्ध गुन्हा दाखल केला.

हेही वाचा : द मिसिंग टाइल सिंड्रोम ठेवा आपल्यापासून दूर

दुसऱ्या गटातील आदीलखान जाफर खान (वय ३५) याच्या तक्रारीवरून मुजाहिद, जाकीर, आसीफ आणि रईस या चौघांविरुद्ध जिल्‍हापेठ पोलिस ठाण्यात गुन्हा दाखल झाला आहे. जवळपास दहापेक्षा अधिक संशयित गुन्हा दाखल करण्यासाठी पोलिस ठाण्यात हजर होते. एका गटाची तक्रार दाखल झाली, तेव्हा दुसऱ्या गटाचे संशयित आले.

परस्पर विरुद्ध गुन्हे दाखल होत असताना, दोन्ही गटांतील संशयित पोलिस ठाण्यात हजर होते. मात्र, पोलिसांना ओळखू न आल्याने संशयित अलगद निसटले. दुसरीकडे जखमी रईस खाटीक याच्या डोक्यावर गंभीर दुखापत झाली असून, त्याला औरंगाबादला हलविण्याचा सल्ला डॉक्टरांनी दिल्याचे कुटुंबीयांनी सांगितले.