Jalgaon Crime News : राज्य परिवहन मंडळाच्या बस वाहकाने महिलेची छेड काढली. हा प्रकार धुळे-अमळनेर बसमध्ये घडलेल्या या प्रकाराचा जाब विचारला असता, वाहकाने वाईट पद्धतीने हातवारे केल्याचे पीडित महिलेचे म्हणणे आहे. (woman was molested by bus conductor jalgaon crime news)

धुळे-अमळनेर बसमध्ये गृहिणी अल्पवयीन मुलीसह प्रवास करत होती. वाहकाने बसमध्ये चढताना त्या महिलेस स्पर्श केला. चुकून हात लागला असावा, म्हणून महिलेने लक्ष दिले नाही. मात्र, या भामट्याने अमळनेर स्थानकात उतरतांना पुन्हा त्या महिलेस स्पर्श केला.

बसमधून उतरताना महिलेने त्याला शिव्यांची लाखोली वाहिली व आरडाओरड करत बस थांबविण्याचा प्रयत्न केला. मात्र, वाहकाने स्थानकातून बस पिटाळून नेली. घडलेल्या प्रकाराबाबत गृहिणीने अमळनेर बसस्थानकावर तक्रार देण्याचा प्रयत्न केला.

हेही वाचा : Credit Card फसवणूक....काय घ्याल काळजी?

मात्र, तक्रार ऐकून घेणारे सक्षम अधिकारी नव्हते. मात्र, पोलिस कर्मचाऱ्याने गृहिणीची आस्थेवाईक विचारणा केल्यावर घडलेला प्रकार सांगितला. मात्र, तो पोलिस इच्छा असूनही काही करु शकला नाही. कारण तो स्वतः संशयित आरोपी घेऊन बसस्थानकावर होता. तर, बस पालघर डेपोची होती आणि अमळनेरहून बस गेली होती.

"त्या महिलेने पोलिसांत तक्रार दिली, तर पोलिस तपास करतील. त्या कर्मचाऱ्याची चौकशी होईल. कारवाई करता येईल. मात्र, खातरजमा करण्यासाठी किंवा त्याचे म्हणणे ऐकण्यासाठी त्या कर्मचाऱ्याचे नाव सांगता येणार नाही." -धनंजय शिंदे, आगार व्यवस्थापक, पालघर