केळघर (जि. सातारा) : तनिष्का व ग्रामपंचायतीच्या सहकार्याने तळोशी (ता. जावळी) या छोट्याशा गावाची ओळख कापडी पिशव्या तयार करणारे गाव म्हणून झाली आहे. विविध शासकीय योजनांमध्ये लोकसहभागातून आपला ठसा उमटवणाऱ्या तळोशी गावातील तनिष्का कापडी पिशव्या तयार करत असल्याने त्यांना शाश्वत उत्पन्नाचा स्रोत निर्माण झाला आहे.
तळोशीतील सुनीता चिकणे, लक्ष्मी चिकणे, पार्वती भणगे, अर्चना चिकणे, संगीता चिकणे या महिलांना "सकाळ'च्या तनिष्का व्यासपीठामार्फत सातारा येथे कापडी पिशव्या व फॅन्सी बॅग, फॅन्सी बटवे, महिलांसाठी हॅंड पर्स बनविण्यासाठी विशेष प्रशिक्षण देण्यात आले होते. मागील वर्षी दहा हजार नग पिशव्या बनवून या महिलांनी विकल्या आहेत. यावर्षी संक्रांतीच्या सणानिमित्ताने वाण म्हणून गावातील महिलांना कापडी पिशव्यांचे वाटप केले आहे. आजूबाजूच्या गावातील महिलासुद्धा वाण म्हणून वाटण्याकरिता तसेच इतर कारणास्तव गावातून पिशव्या विकत घेऊन जातात. गावात आलेल्या पाहुण्यांचा सत्कार करताना शाल, श्रीफळऐवजी कापडी पिशवी व आयुर्वेदिक झाडाचे रोप देऊन सत्कार केला जातो, अशी माहिती ग्रामसेवक अमोल गायकवाड यांनी दिली.
घरची व शेतातील कामे करून थोडा वेळ पिशव्या बनवायचे काम या महिला करत असतात. प्लॅस्टिक बंदीमुळे कापडी पिशव्यांना चांगली मागणी असून, या पिशव्यांचा दर हा दहा रुपयांपासून 50 रुपयांपर्यंत असून, या महिला आकर्षक पिशव्या तयार करत आहेत. "तनिष्कां'ना कापडी पिशव्या तयार करण्याचे प्रशिक्षण देण्यात आल्याने प्रशिक्षण घेतलेल्या महिला गावातील महिलांना पिशव्या तयार करण्यास शिकवत आहेत. प्लॅस्टिकला पर्याय म्हणून या पिशव्यांना चांगली मागणी असून, या पिशव्यांना पाचगणी, महाबळेश्वर येथे मागणी आहे. या छोट्याशा उद्योगामुळे महिलांना गावातच रोजगाराची संधी उपलब्ध झाली आहे.
तनिष्का व महिला दर्जेदार कापडी पिशव्या तयार करत असल्याने गावाची ओळख कापडी पिशव्या तयार करणारे गाव म्हणून होत आहे. यात ग्रामपंचायत, "सकाळ' तनिष्का, ग्रामस्थांचे सहकार्य मिळाले आहे. पंचायत समितीच्या समृद्ध ग्राम योजनेंतर्गत गावामध्ये मागेल त्याला रोजगार व खादी ग्रामोद्योग महामंडळाच्या सहकार्याने गावात मधुमक्षिका पालन करून खऱ्या अर्थाने गाव आर्थिक समृद्धीकडे वाटचाल करणार आहे.
-संतोष चिकणे, सरपंच, तळोशी
साताऱ्याच्या बातम्या वाचण्यासाठी येथे ► क्लिक करा
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.