Chiplun News : विरोधी पक्षनेते अजित पवार (Ajit Pawar) यांनी राष्ट्रवादी काँग्रेसमध्ये (NCP Crisis) बंडाचे निशाण फडकवत सत्ताधारी शिंदे-भाजप सरकारला पाठिंबा देत उपमुख्यमंत्रिपदाची शपथ घेतली. त्यातील राष्ट्रवादीच्या काही आमदारांनी त्यांना पाठिंबाही दिला.

जिल्ह्यात राष्ट्रवादीचा एकमेव आमदार असलेल्या शेखर निकमांनीही (Shekhar Nikam) अजित पवारांना साथ दिली. हा निर्णय का घेतला त्याचा उलगडा होण्यासाठी सावर्डे येथे रविवारी (ता. ९) सकाळी ११ वा. राष्ट्रवादी काँग्रेसतर्फे ग्रामीण भागातील प्रमुख पदाधिकारी व कार्यकर्त्यांच्या बैठकीचे आयोजन करण्यात आले आहे.

आमदार शेखर निकम यांनी उपमुख्यमंत्री अजित पवारांना पाठिंबा देण्याचा निर्णय घेतला आहे व या निर्णयाशी ते ठाम आहेत. निर्णय घेण्याची प्रक्रिया ही एवढ्या कमी वेळेत झाली की, आमदार शेखर निकमांना कार्यकर्त्यांसोबत कोणतीही चर्चा करण्यासाठीचा अवधी मिळालेला नाही. याबाबतची खंत त्यांच्या मनातदेखील आहे.

या नंतरच्या दोन-तीन दिवसातील चालू राजकीय घडामोडींमुळे पदाधिकारी व कार्यकर्त्यांशी त्यांचा संवाद झाला नाही. चिपळूण तालुक्यातील सर्व राष्ट्रवादी काँग्रेस पार्टी पदाधिकारी व कार्यकर्त्यांचा पाठिंबा आमदार शेखर निकम यांच्यासोबत राहावा यासाठी घेतलेल्या निर्णयाबाबतची भूमिका मांडण्यासाठी व सविस्तर चर्चा करण्यासाठी मेळाव्याचे आयोजन करण्यात आले आहे.

हा मेळावा ९ जुलैला सकाळी ११ वाजता आयटीआय कॅम्पस, सावर्डे सभागृहात होणार आहे. यासाठी तालुक्यातील राष्ट्रवादी काँग्रेस पार्टीच्या प्रमुख पदाधिकारी व कार्यकर्ते यांना निमंत्रित केले आहे. यामध्ये आमदार निकम यांनी भूमिकेचा उलगडा केला तरी कार्यकर्ते काय सांगणार, याकडेही लक्ष लागलेले आहे.