कणकवली : आदित्‍य ठाकरे (Aditya Thackeray) हे सिंधुदुर्गातील चिपी विमानतळावर (Chipi Airport) दाखल होणार आहेत. त्‍यामुळे चिपी आणि गोव्यातील मोपा विमानतळ (Mopa Airport) यातील फरक आमदार नीतेश राणेंना कळतो का?, अशी टीका शिवसेना नेते सतीश सावंत यांनी केली.

ठाकरे कुटुंब आणि खासदार संजय राऊत यांच्यावर टीका करणे हेच आता राणेंचे व्हीजन झाले असल्‍याचेही ते म्‍हणाले. येथील शिवसेना कार्यालयात सतीश सावंत यांनी पत्रकार परिषद घेतली. त्‍यांच्यासोबत युवासेना जिल्‍हाप्रमुख सुशांत नाईक, तालुकाप्रमुख शैलेश भोगले, शहर प्रमुख प्रमोद मसुरकर, महेश कोदे, विलास गुडेकर आदी उपस्थित होते.

सावंत म्‍हणाले, नीतेश राणे यांनी कणकवली मतदारसंघातील प्रश्‍नांकडे कधी ढुंकूनही पाहिलेले नाही. इथल्‍या समस्यांना त्‍यांनी कधीही वाचा फोडलेली नाही. केवळ ठाकरे कुटुंबिय आणि संजय राऊत यांच्यावर सतत टीका करून प्रसिद्धी मिळविणे हेच आता त्‍यांचे व्हीजन झालेले आहे.

युवासेना प्रमुख आदित्य ठाकरे हे खळा बैठकांच्या माध्यमातून शिवसैनिक आणि जनतेशी थेट संवाद साधणार आहेत. त्‍यांच्या दौऱ्यामुळे शिवसेना कार्यकर्त्यांमध्ये चैतन्याचे वातावरण आहे. कणकवली पटवर्धन चौकात आज (ता.२३) दुपारी त्‍यांचे भव्य स्वागत होईल. त्यानंतर तेकार्यकर्त्यांशी थेट संवाद साधला जाणार आहेत, असे सतीश सावंत म्‍हणाले.