Adil Rashid England Vs Pakistan T20 World Cup Final : मेलबर्न येथे सुरू असलेल्या इंग्लंड आणि पाकिस्तान यांच्यातील टी 20 वर्ल्डकप 2022 फायनल सामन्यात इंग्लंडने पाकिस्तानला 20 षटकात 8 बाद 137 धावात रोखले. नाणेफेक जिंकून प्रथम गोलंदाजी करणाऱ्या इंग्लंडकडून फिरकीपटू आदिल राशिदने दमदार मारा करत पाकिस्तानचे दोन फलंदाज बाद केले. विशेष म्हणजे त्याने 4 षटकात फक्त 22 धावा देत ही कामगिरी केली. त्याने पाकिस्तानच्या फलंदाजीचा कणा म्हणून ओळखल्या जाणाऱ्या बाबर आझमला 32 धावांवर बाद करत पाकिस्तानला मोठा धक्का दिला.

विशेष म्हणजे आदिल राशिदचे मूळ पाकिस्तानातील मीरपूर येथे आहे. यॉर्कशायरनिवासी असलेल्या आदिल राशिदचे पूर्वज हे 1967 मध्ये मीरपूरवरून इंग्लंडला स्थलांतरित झाले होते. राशिद जरी इंग्लंडचा नागरिक असला तरी त्याचे पाकिस्तान प्रेम काही कमी झालेले नाही. त्याला अव्वल पाकिस्तानी फलंदाजाची शिकार करण्यास फार मजा येते. त्यामुळेच त्याने आदिल राशिदने बाबर आझमला यापूर्वी तीनवेळा बाद केले होते. दुसरीकडे बाबरला राशिद विरूद्ध 61 चेंडूंचा सामना करून फक्त 77 धावाच करता आल्या आहेत. बाबर आझम आदिलची गुगली ओळखू शकत नाही. आजही तो 28 चेंडूत 32 धावा करत राशिदच्या गुगलीवरच बाद झाला.

इंग्लंडने पाकिस्तानची 20 षटकात 8 बाद 137 धावा अशी अवस्था केली असली तरी पाकिस्तानने देखील इंग्लंडला पॉवर प्लेमध्ये धक्के दिले. शाहीन आफ्रिदीने अॅलेक्स हेल्सचा 1 धावेवर त्रिफळा उडवला तर चौथ्या षटकात हारिस रौऊफने फिलिप सॉल्टला 10 धावांवर बाद केले. दरम्यान, इंग्लंडचा डाव एकहाती सांभाळून आक्रमक सुरूवात करणाऱ्या जॉस बटरला हारिस रौऊफने 26 धावांवर बाद केले. बटरलने 17 चेंडूत 26 धावा करत इंग्लंडला पाच षटकात 43 धावांपर्यंत पोहचवले होते.