नवी दिल्ली : भारतीय हॉकी संघांना आशिया कप स्पर्धेत (Asia Cup Hockey) साखळी फेरीत इंडोनेशियाचा 16 - 0 अशा गुणफरकाने पराभव केला. भारताने या विजयाबरोबरच सुपर 4 मध्ये देखील प्रवेश केला आहे. भारताने आजचा सामना जिंकत पाकिस्तानशी बरोबरी केली. भारतासाठी (Team India) गोलमधील फरक देखील पाकिस्तानपेक्षा चांगला असणे गरजेचे होते. त्यामुळे भारताला 16 गोलफरकाने विजयी होणे गरजेचे होते. भारताने जरी इंडोनेशियाचा 16 - ० असा पराभव केला असला तरी भारताचा हा सर्वात मोठा विजय नाही. यापूर्वी 1932 मध्ये ऑलिम्पिकमध्ये भारताने अमेरिकेचा 24-1 ने पराभव केला होता.

2023 मध्ये होणाऱ्या हॉकीच्या वर्ल्डकपचे आयोजन भारतात होणार आहे. त्यामुळे भारत वर्ल्डकपसाठी आधीच पात्र झाला होता. मात्र पाकिस्तानला 2023 मधील वर्ल्डकपसाठी पात्रता फेरी पार करता आलेली नाही. तर जपान, दक्षिण कोरिया, मलेशिया वर्ल्डकपसाठी पात्र झाले आहेत. सुरूवातीच्या सामन्यात भारतीय संघ जवळपास स्पर्धेतून बाहेर गेला होता. मात्र पूल ए मधील सामन्यात जपानने पाकिस्तानचा (Pakistan) 3-2 असा पराभव केला आणि भारताला संधी मिळाली. पहिल्या दोन सामन्यात भारताचा लौकिकास साजेसा खेळ झाला नव्हता. सलामीचा भारत - पाकिस्तान सामना 1-1 असा बरोबरीत सुटला. त्यानंतर भारताला जपानने 5-2 असा पराभव सहन करावा लागला.

पूल ए मध्ये जपान 9 अंकासह नॉक आऊटसाठी पात्र झाला आहे. त्याने आपले तीनही सामने जिंकले. तर पाकिस्तानने तीन सामन्यापैकी एक सामना जिंकला होता. तर एक ड्रॉ आणि एक पराभवामुळे ते 4 गुणांवर होते. भारतही गुणतालिकेत 4 गुण घेऊन पाकिस्तानच्या बरोबर होता. मात्र गोलफरकामुळे भारताने सुपर 4 मध्ये स्थान मिळवले. भारत आशिया कप हॉकी स्पर्धेत विक्रम आठव्यांदा फायनल्समध्ये पोहचला आहे. पाकिस्तानने 6 वेळा फायनल गाठली आहे.