West Indies Vs India 2nd ODI : पोर्ट ऑफ स्पेन येथे झालेल्या दुसऱ्या एकदिवसीय सामन्यात भारताने वेस्ट इंडीजचा 2 विकेट्सनी पराभव करत मालिकेत 2-0 अशी विजयी आघाडी घेतली. वेस्ट इंडिजवर भारताचा हा सलग 12वा मालिका विजय आहे. अष्टपैलू अक्षर पटेल भारताच्या विजयाचा हिरो ठरला. अक्षर पटेलने (Axar Patel) झुंजार अर्धशतकी खेळी करत वेस्ट इंडीजने ठेवलेले विजयासाठीचे 312 धावांचे आव्हान 49.4 षटकात पार केले. त्याने षटकार ठोकत भारताचा मालिका विजय साकारला.

अष्टपैलू अक्षर पटेलने कठीण काळात भारतासाठी 64 धावांची नाबाद खेळीत भारताला विजय मिळवून दिला. त्याचे हे वनडेतील पहिले अर्धशतक आहे. याआधी त्याने अप्रतिम गोलंदाजी करत 9 षटकात 40 धावा देत 1 बळी घेतला. अक्षर पटेलला त्याच्या अष्टपैलू कामगिरीसाठी सामनावीर म्हणून गौरवण्यात आले. सामन्यानंतर तो म्हणाला, ही खेळी माझ्यासाठी खूप खास आहे, कारण त्यामुळे संघाला मालिका जिंकण्यात मदत झाली. मी जेव्हा फलंदाजीसाठी आलो तेव्हा प्रत्येक षटकात 10-11 धावा करण्याचे लक्ष्य माझ्या मनात होते. माझ्यासाठी हे विशेष होते कारण 2017 नंतरची ही माझी पहिली एकदिवसीय मालिका आहे. माझ्या एकदिवसीय कारकिर्दीतील पहिले अर्धशतकही केले आणि त्यासोबत मालिका जिंकली.

सामन्याबद्दल बोलायचं झालं तर, नाणेफेक जिंकून प्रथम फलंदाजी करताना वेस्ट इंडिज संघाने 50 षटकात 6 गडी गमावून 311 धावा केल्या. शाई होपने कारकिर्दीतील 100 वा वनडे खेळताना 115 धावा केल्या. निकोलस पूरनने 74 धावांची खेळी खेळली. भारताकडून शार्दुल ठाकूरने सर्वाधिक तीन बळी घेतले. आवेशचा हा डेब्यू वनडे होता आणि तो चांगलाच महागात पडला. त्याने 6 षटकात 54 धावा दिल्या. प्रत्युत्तरात टीम इंडियाने 49.4 षटकांत 8 गडी गमावून विजयाचे लक्ष्य गाठले. टीम इंडियाकडून श्रेयस अय्यर (63), संजू सॅमसन (54) आणि शुभमन गिलने 43 धावा केल्या.