Devon Conway Thumb Injury : आयपीएलचा नवा हंगाम सुरू होण्यासाठी फारच कमी दिवस राहिले आहे. आणि त्याआधी गतविजेत्या चेन्नई सुपर किंग्जला मोठा धक्का बसला आहे. संघाचा स्टार सलामीवीर डेव्हन कॉनवे दुखापतीमुळे मे पर्यंत आयपीएल 2024 मधून बाहेर जाऊ शकतो. खरंतर, ऑस्ट्रेलियाविरुद्ध नुकत्याच झालेल्या टी-20 मालिकेदरम्यान कॉनवेच्या अंगठ्याला दुखापत झाली होती.

या दुखापतीमुळे तो कांगारूंविरुद्धच्या कसोटी मालिकेतील पहिला सामनाही खेळू शकला नाही. पण आता न्यूझीलंड क्रिकेटने त्याच्या दुखापतीबाबत अपडेट देताना सांगितले आहे की, कॉनवेची अंगठ्याची शस्त्रक्रिया होणार असून त्यामुळे तो 8 आठवडे मैदानाबाहेर राहणार आहे.

जो चेन्नई सुपर किंग्ज संघ आणि चाहत्यांसाठी मोठा धक्का आहे. ड्वेन कॉनवे हा चेन्नई सुपर किंग्जचा महत्त्वाचा फलंदाज मानला जातो. कॉनवेचा सध्याचा फॉर्मही चांगला आहे, त्यामुळे तो सुरुवातीच्या सामन्यांमधून बाहेर जाणे सीएसकेसाठी मोठा धक्का आहे. चेन्नई सुपर किंग्जचे सराव शिबिरही गेल्या आठवड्यात सुरू झाले आहे. आता हळूहळू सीएसकेचे उर्वरित खेळाडूही या सराव शिबिरात सहभागी होणार आहेत.

ड्वेन कॉनवेसाठी आयपीएल 2023 खूपच चांगली गेली होती. गेल्या मोसमात ड्वेन कॉनवेने सीएसकेला चॅम्पियन बनवण्यात महत्त्वाची भूमिका बजावली होती. आयपीएल 2023 मध्ये कॉनवेने 51.69 च्या सरासरीने 672 धावा केल्या. या काळात त्याने 6 अर्धशतके झळकावली. 22 मार्चपासून आयपीएल 2024 सुरू होत आहे. चेन्नई सुपर किंग्ज त्यांच्या घरच्या मैदानावर रॉयल चॅलेंजर्स बंगळुरूविरुद्ध स्पर्धेतील सलामीचा सामना खेळणार आहे.

चेन्नई सुपर किंग्ज संघ आयपीएल 2024 : एमएस धोनी (कर्णधार), मोईन अली, दीपक चहर, डेव्हन कॉनवे, तुषार देशपांडे, शिवम दुबे, ऋतुराज गायकवाड, राजवर्धन हंगरकर, रवींद्र जडेजा, अजय मंडल, मुकेश चौधरी, मथिशा पाथीराना, शेखर शेख, ए. रशीद, मिचेल सँटनर, सिमरजीत सिंग, निशांत सिंधू, प्रशांत सोळंकी, महेश थेक्षाना, रचिन रवींद्र, शार्दुल ठाकूर, डॅरिल मिशेल, समीर रिझवी, मुस्तफिजुर रहमान.