मुंबई इंडियन्सचा कर्णधार रोहित रोहित शर्माने (Rohit Sharma) पंजाब किंग्ज विरुद्धच्या सामन्यात मोठी खेळी करण्यात अपयशी ठरला. पण छोट्याखानी खेळीनं त्याने मोठा विक्रम आपल्या नावे केला आहे. पंजाब किंग्ज (PBKS) विरुद्ध पुण्याच्या मैदानात रंगलेल्या सामन्यात 25 वी धाव घेताच रोहितच्या नावे खास विक्रमाची नोंद झाली. टी 20 क्रिकेटमध्ये 10 हजार धावांचा टप्पा त्याने पार केला. अशी कामगिरी करणारा भारताचा तो दुसरा खेळाडू ठरलाय. क्रिकेट जगतातील खेळाडूंमध्ये तो सातव्या क्रमांकावर आहे. याआधी भारताकडून ही कामगिरी विराट कोहलीने केली आहे. आयपीएलसह आंतरराष्ट्रीय क्रिकेटमधील धावांचाही यात समावेश आहे.

पंजाब विरुद्धच्या सामन्यात नाणेफेक जिंकून रोहित शर्माने पहिल्यांदा गोलंदाजी करण्याचा निर्णय घेतला. शिखर धवन आणि मयंक अग्रवालच्या अर्धशतकी खेळीच्या जोरावर पंजाबने पहिल्यांदा बॅटिंग करताना 5 गड्यांच्या मोबदल्यात 198 धावा केल्या. या धावांचा पाठलाग करण्यासाठी मैदानात उतरलेल्या रोहितने संघाला चांगली सुरुवात करुन दिली. तो या महत्त्वपूर्ण सामन्यात मोठी खेळी करेल, असे वाटत होते. पण रबाडाच्या गोलंदाजीवर मोठा फटका मारताना तो बाद झाला. त्याने 17 चेंडूत 3 चौकार आणि 2 षटकाराच्या मदतीने 28 धावांची खेळी केली. त्याच्या खात्यात आता टी-10 क्रिकेटमध्ये 10000 + धावा जमा झाल्या आहेत.