Riyan Parag News: इंडियन प्रीमियर लीग 2024 स्पर्धेत गुरुवारी राजस्थान रॉयल्स विरुद्ध दिल्ली कॅपिटल्स संघात सामना झाला. जयपूरला झालेल्या या सामन्यात राजस्थान रॉयल्सने 12 धावांनी रोमांचक विजय मिळवला.

राजस्थानचा हा या हंगामातील दुसरा विजय आहे. राजस्थानच्या या विजयात 22 वर्षीय रियान परागने महत्त्वाची भूमिका बजावली. त्यामुळे त्याला या सामन्यातील सामनावीर पुरस्कारही देण्यात आला. या सामन्यानंतर त्याने सांगितले की तो गेले काही दिवस आजारी होता.

परागने या सामन्यात 45 चेंडूत 7 चौकार आणि 6 षटकारांसह 84 धावांची नाबाद खेळी केली. ही त्याची आयपीएल कारकिर्दीतील सर्वोच्च खेळी आहे. त्याच्या याच खेळीमुळे राजस्थानला प्रथम फलंदाजी करताना 20 षटकात 5 बाद 185 धावांपर्यंत पोहचता आले.

या सामन्यानंतर सामनावीर पुरस्कार जिंकल्यानंतर पराग म्हणाला, 'भावना नियंत्रणात ठेवल्या आहेत. आई इकडे आली आहे. तिने गेल्या 3-4 वर्षात माझा संघर्ष पाहिला आहे. मलाही माहित आहे की माझी स्वत:बद्दल काय मतं आहेत. ती मतं मी शुन्यावर बाद होवो किंवा नाही, तरी बदलणार नाहीत.'

परागने देशांतर्गत क्रिकेटमधील फॉर्मचाही फायदा झाल्याचेही सांगितले. तो म्हणाला, 'माझ्यासाठी हा क्रिकेटचा हंगामही चांगला गेला आहे, माझी यंदाची देशांतर्गत क्रिकेटमधील कामगिरीही चांगली झाली, ज्याची मला मदत झाली आहे.'

त्याच्या खेळीबद्दल तो म्हणाला, 'पहिल्या चार फलंदाजांपैकी एकाने तरी 20 षटकांपर्यंत फलंदाजी करण्याची गरज होती. खेळपट्टीवर चेंडू खाली राहत होता आणि थांबून येत होता. पहिल्या सामन्यात संजू सॅमसनने चांगली फलंदाजी केलेली.'

तो पुढे म्हणाला, 'मी खूप मेहनत घेतली आहे. मी गेले 3 दिवस बेडवर पडून होतो. मी पेनकिलर्स खात होतो. मी आजच उठलो आणि मी खूपच आनंदी आहे.'

दरम्यान, या सामन्यात 186 धावांच्या आव्हानाचा पाठलाग करताना दिल्लीला 20 षटकात 5 बाद 173 धावाच करता आल्या.