मुंबई : भारताचा भालाफेकपटू नीरज चोप्राचा (Neeraj Chopra) हरियाणातील खांडरा गावापासून टोकियो ऑलिम्पिकमध्ये सुवर्णफेकी करण्यापर्यंतचा प्रवास युट्यूबवर (You Tube) प्रदर्शित होणार आहे. हा प्रवास युट्यूबवरील क्रिएटिंग इंडिया (Creating India) या सिरीजमध्ये दाखवण्यात येणार आहे.

नीरज चोप्राच्या मते या उपक्रमाद्वारे तरूणांना अॅथलेटिक्स, खेळ आणि भालाफेक याबाबत सजगता निर्माण होईल अशी आशा आहे. या उपक्रमाअंतर्गत स्वतःचा अधिकृत युट्यूब चॅनेल (You Tube Channel) सुरू करणे आणि त्यावर खेळ आणि त्याच्या आयुष्याबद्दलचा कंटेंट शेअर करणे याबरोबरच भारताच्या पुढच्या पिढीला प्रोत्साह देण्याचीही मोहीम हातात घेतली जाणार आहे.

याबाबत जेएसडब्लू स्पोर्ट्सचे सेल्स आणि मार्केटिंग प्रमुख दिव्यांशू सिंह यांनी सांगितले की, 'आम्ही या भागीदारीबाबत खूप उत्साही आहोत. युट्यूब हा नीरजसाठी एक चांगला प्लॅटफॉर्म आहे. याद्वारे तो मोठ्या जनसमुदायाला त्याची प्ररणादायी कथा सांगू शकेल. सध्या व्हिडिओ फॉरमॅटची चांगली चलती आहे. भारतातील शहरी तसेच ग्रामीण भागातील लोकांमध्ये व्हिडिओला जास्त मागणी आहे. त्यामुळे आम्ही नीरज हा खेळ आणि अॅथलेटिकला या लोकांपर्यंत पोहचवण्यासाठी योग्य व्यक्ती आहे.'