Pujara 100th Test : भारताचा अनुभवी फलंदाज चेतेश्वर पुजारा उद्यापासून त्याच्या कारकिर्दीतील 100 वा कसोटी सामना खेळणार आहे.

हेही वाचा : वर्क फ्राॅम होम ते 'कायमचे घरी बसा?' हा प्रवास नक्की काय सांगतोय...

दिल्लीतील अरुण जेटली स्टेडियमवर होणारी ऑस्ट्रेलियाविरुद्धची दुसरी कसोटी हा त्याचा 100 वा सामना असेल. चार सामन्यांच्या बॉर्डर-गावस्कर ट्रॉफीमध्ये भारतीय संघाने 1-0 ने आघाडीवर आहे.

100 कसोटी खेळणारा पुजारा भारताचा 13वा खेळाडू ठरणार आहे. मात्र, या सामन्यापूर्वी पुजाराच्या वडील अरविंद पुजारा यांनी एका मुलाखतीत बॉलिवूड सुपरस्टार शाहरुख खानबद्दल मोठा खुलासा केला आहे.

2009 मध्ये शाहरुखने आपल्या मुलाला कशाप्रकारे मदत केली होती याबाबत पुजाराच्या वडिलांनी भाष्य केले आहे.

पुजारा कोलकाता नाईट रायडर्सकडून आयपीएल खेळत असताना 2009 मध्ये दक्षिण आफ्रिकेत आयपीएलचे आयोजन करण्यात आले होते. कोलकाताकडून खेळताना पुजाराच्या हॅमस्ट्रिंग तुटली होती.

यानंतर पुजाराचं कुटुंबीय त्याला राजकोटला आणू इच्छित होते. येथे त्यांना सर्जरी करायची होती. ही बाब KKR संघाचा मालक शाहरूखला कळाल्यानंतर त्याने पुजाराच्या कुटुंबीयांशी चर्चा केली.

रग्बी खेळाडूंना अशा प्रकारची दुखापत सातत्याने होत असते. अशा खेडाडूंवर दक्षिण अफ्रिकेतील डॉक्टर यशस्वीपणे सर्जरी करतात त्यामुळे चेतेश्वरवर दक्षिण अफ्रिकेत व्हायला हवी असा आग्रह शाहरूखचा होता.

पुजाराच्या वडिलांकडे नव्हता पासपोर्ट

पुजाराचं भवितव्य खूप चांगले आहे. त्यामुळे त्याच्यावर उत्तम वैद्यकीय सुविधा मिळणे गरजेचे असल्याचे मत शाहरूखचे होते. यासाठी शाहरूख पुजाराच्या कुटुंबीयांना विमानाने दक्षिण अफ्रिकेला घेऊन जाण्यास तयार होता.

मात्र, यावेळी पुजाराच्या वडिलांनी आपल्याकडे पासपोर्ट नसल्याचा खुलासा केला. त्यानंतर पासपोर्टसाठी आवश्यक असलेली सर्व प्रक्रिया तातडीने पूर्ण करण्यात आली. त्यानंतर पुजाराचे वडील चेतेश्वरसोबत दक्षिण अफ्रिकेला जाऊ शकले.

एक वर्षानंतर 2010 मध्ये पुजाराने त्याच्या कारकिर्दीतील पहिला कसोटी सामना बंगळुरूमध्ये ऑस्ट्रेलियाविरुद्ध खेळला होता. त्यानंतर आता योगायोगाने याच संघाविरुद्ध तो उद्या 100वी कसोटी खेळणार आहे.