Ravindra Jadeja Asia Cup 2022 : आशिया कप-2022 च्या पहिल्या सामन्यात भारताने पाकिस्तानचा 5 गडी राखून पराभव केला. या सामन्यात हार्दिक पांड्यासोबत रवींद्र जडेजाही भारताच्या विजयाचा हिरो ठरला. या सामन्यात जडेजाला चौथ्या क्रमांकावर फलंदाजीसाठी पाठवण्यात आले. त्याने 35 धावांची महत्त्वपूर्ण खेळी खेळली. हाँगकाँगविरुद्ध 31 ऑगस्टला होणाऱ्या दुसऱ्या सामन्यासाठी सज्ज झाला आहे. या सामन्यापूर्वी पत्रकार परिषदेत जडेजाने स्वत:शी संबंधित अफवांवर आणि हाँगकाँगविरुद्धच्या सामन्याच्या तयारीवर खुलेपणाने भाष्य केले.

शेवटची आयपीएल झाल्यावर माझ्याबद्दल वाट्टेल त्या बातम्या माध्यमातून फिरत होत्या. मी दुखापतीने बेजार आहे आणि पुढचा वर्ल्ड कपसुद्धा खेळू शकणार नाही, इथपासून ते माझ्या मृत्यूच्या देखील बातम्या आल्या होत्या, पण बाहेर काय चालू आहे, याकडे मी जास्त लक्ष देत नाही. सरावादरम्यान सतत सुधारणा करायला धडपडतो आणि सामन्यात त्याचा आधार घेऊन खेळतो, असे भारताचा अष्टपैलू रवींद्र जडेजाने सांगितले.

पाकिस्तानसमोर मला संघाने वरच्या क्रमांकावर फलंदाजीला पाठवले ते आव्हान मला वाटले. भारतासाठी खेळत असताना दडपणाखाली सर्वोत्तम कामगिरी करून दाखवायची हिंमत ठेवावी लागते, असे जडेजा म्हणाला.

रवींद्र जडेजा याशिवाय आगामी स्पर्धेसाठी भारतीय संघाच्या तयारीवर म्हणाला, आम्हाला टी-20 विश्वचषकात चांगली कामगिरी करायची आहे. पण सध्या आमचे संपूर्ण लक्ष 31 ऑगस्ट रोजी हाँगकाँगविरुद्धच्या सामन्यावर आहे. त्यानंतर सुपर फोरचा विचार करू. आम्ही सकारात्मक क्रिकेट खेळू इच्छितो आणि प्रत्येक सामन्यात आमचे सर्वोत्तम देण्याचा प्रयत्न करू. सध्या तरी विश्वचषकाचा विचार नाही. आम्ही हाँगकाँगशी बरोबरी करण्यासाठी सज्ज आहोत. यानंतर, कोणता संघ पुढील स्पर्धा करेल ते पाहू.

जर भारताने हाँगकाँगला हरवले तर सुपर-4 मध्ये पोहोचेल. आशिया चषक स्पर्धेत भारताने हाँगकाँगचा दोनदा सामना केला आहे आणि दोन्ही वेळा विजय मिळवला आहे.