Rohan Bopanna and Matthew Ebden: भारताचा स्टार टेनिसपटू रोहन बोपन्ना आणि त्याचा ऑस्ट्रेलियन साथीदार मॅथ्यु एब्डेन यांच्या जोडीने मियामी ओपनच्या अंतिम सामन्यात प्रवेश केला आहे.

त्यांनी गुरुवारी (28 मार्च) उपांत्य सामन्यात मार्सेल ग्रॅनोलर्स आणि होरासिओ झेबालोस यांना पराभूत करत या हंगामातील दुसरी अंतिम फेरी गाठली. यापूर्वी बोपन्ना आणि एब्डेन यांनी जानेवारीमध्ये ऑस्ट्रेलियन ओपन स्पर्धा जिंकली होती.

दरम्यान, गुरुवारी मिळवलेल्या विजयासह 44 वर्षीय बोपन्ना पुन्हा एकदा दुहेरीत जागतिक्रवारीमध्ये अव्वल स्थान मिळवले. बोपन्ना आणि एब्डेन यांनी उपांत्य फेरीत ग्रॅनोलर्स आणि झेबालोस यांनी 6-1,6-4 अशा सरळ दोन सेटमध्ये पराभूत केले.

या सामन्यातील पहिल्या सेटमध्ये बोपन्ना आणि एब्डेन यांनी पूर्ण वर्चस्व ठेवलं होतं, तर दुसऱ्या सेटमध्ये ग्रॅनोलर्स आणि झेबालोस यांनी झुंज देण्याचा प्रयत्न केला, परंतु, बोपन्ना आणि एब्डेन यांनी त्यांना वरचढ होऊ दिलं नाही.

आता अंतिम सामन्यात बोपन्ना आणि एब्डेन यांना इव्हान डोडिग आणि ऑस्टिन क्रॅजिसेक यांचा सामना करायचा आहे.

दरम्यान, बोपन्नाने एटीपी मार्स्टर्स 1000 स्पर्धेत अंतिम फेरीमध्ये पोहचण्याची ही 14 वी वेळ आहे, तर मियामी ओपनमध्ये तो पहिल्यांदाच अंतिम फेरीत पोहचला आहे. त्याचबरोबर एकूण 63 व्यांदा तो एटीपी स्पर्धेच्या अंतिम सामन्यात पोहचला असून आत्तापर्यंत त्याने 25 वेळा दुहेरीत विजेतेपद जिंकले आहे.

इतकेच नाही, तर बोपन्ना लिअँडर पेसनंतरचा दुसराच भारतीय टेनिसपटू आहे, ज्याने सर्व 9 एटीपी मास्टर्स स्पर्धेत अंतिम फेरी गाठली आहे.