Wrestler Protest Vinesh vs Babita Phogat : भारतीय कुस्ती महासंघाचे अध्यक्ष बृजभूषण शरण सिंह यांच्याविरूद्ध लैंगिक शोषणाचे आरोप करत देशाच्या पदक विजेत्या कुस्तीपटूंनी जंतर मंजरवर आंदोलन सुरू केले आहे. आता या आंदोलनाला वेगळे वळण लागले. देशाकडून कुस्तीत पदके पटकावणाऱ्या फोगाट भगिनी एकमेकींच्या विरोधात उभ्या ठाकल्या. आंदलोनाला बसलेली विनेश फोगाट आणि भाजपच्या तिकीटावर निवडणूक लढलेली बबिता फोगाट यांच्यात शाब्दिक द्वंद्व पेटले आहे.

काँग्रेस नेत्या प्रियांका गांधी वधेरा यांनी आंदोलनकर्त्या कुस्तीपटूंची भेट घेतल्यानंतर बबिता फोगाटने यावर टीका केली होती. याला विनेश फोगाटने प्रत्युत्तर दिले आहे. विनेश म्हणाली की, 'माझी बहिण बबिता जर तुला पीडित कुस्तीपटूंच्या बाजूने उभे रहाता येत नसेल मी तुला हात जोडून विनंती करते एकच विनंती करते आमची चळवळ कमकूवत करू नकोस. महिला कुस्तीपटूंना त्यांच्याविरूद्धच्या अन्यायाविरूद्ध उभे राहण्यासाठी अनेक वर्षे लागली आहेत. तू देखील एक महिलाच आहेस. आमच्या वेदना समजून घे.'

भाजप सदस्य असलेली बबिता फोगाटने प्रियांका गांधी वधेरा यांनी आंदोलन करणाऱ्या कुस्तीपटूंशी चर्चा केल्यावर ट्विट करत टीका केली होती. ती म्हणाली होती की, 'प्रियांका गांधी वधेरा या त्यांचे स्वीय सचिव संदीप सिंह यांच्यासह जंतर मंतरवर महिला कुस्तीपटूंना न्याय मिळवा म्हणून पोहचल्या. मात्र ज्या व्यक्तीबरोबर त्या आल्या होत्या त्याच्यावरच महिलांशी गैरवर्तन आणि दलित महिलेचा अपमान केल्याचे आरोप आहेत.' बबिताने गेल्या हरियाणा विधानसभा निवडणुकीत भाजपच्या तिकीटावर निवडणूक लढवली होती.

(Sports Latest News)