हिवाळ्यात सर्वात जास्त त्रास हा आपल्या त्वचेला होतो. त्वचेतील आद्रता कमी झाल्याने त्वचा कोरडी आणि निर्जीव होते. त्यामूळे हिवाळ्यातही लोक शरीरावर तसेच चेहऱ्यावर विविध प्रकारचे बॉडी लोशन वापरतात. पण बॉडी लोशन चेहऱ्यावर लावण्याचे दुष्परिणाम तूम्हाला माहिती आहे का?

नाही ना?,  तुम्हीही चेहऱ्यावर बॉडी लोशन लावत असाल तर आजपासूनच बंद करा. कारण, चेहऱ्याला बॉडी लोशन लावणे महागात पडू शकते. लोक चेहरा आणि शरीरावरील इतर त्वचेला एकसारखेच मानून बॉडी लोशन चेहऱ्याला लावतात. पण, असे करणे धोकादायक ठरू शकते.

चेहऱ्यावर बॉडी लोशन लावणे बंद केल्याने तुम्ही त्वचेच्या अनेक समस्या टाळू शकता. मग, चेहऱ्याला काय लावणे योग्य ठरेल याबद्दल जाणून घेऊयात.

चेहऱ्याच्या समस्या

बॉडी लोशनची पीएच पातळी खूप जास्त असते. अशा परिस्थितीत चेहऱ्याची त्वचा बॉडी लोशन पूर्णपणे शोषण्यास सक्षम नसते. त्यामुळे चेहऱ्यावरील त्वचेचे छिद्र बंद होतात आणि तुमच्या चेहऱ्यावर अनेक समस्या दिसू लागतात.

ब्लॅकहेड्स  वाढतात

बॉडी लोशन लावल्याने चेहऱ्यावरील चेहऱ्यावरील छिद्रे ब्लॉक होतात. त्यामुळे छिद्रांमध्ये घाण साचते आणि चेहऱ्यावर ब्लॅकहेड्स येऊ लागतात. त्यामूळे चेहरा निस्तेज दिसू लागतो.

त्वचा अधिकच कोरडी होते

चेहऱ्यावर बॉडी लोशन लावल्याने त्वचेवर ट्रायक्लोसन कंपाऊंड वाढू लागते. त्यामुळे चेहऱ्याचे नैसर्गिक तेल संपून त्वचा कोरडी पडू लागते. अशावेळी चेहऱ्यावर बॉडी लोशनचा वापर केल्याने त्वचा कोरडी पडते.

त्वचेच्या पेशी खराब होतात

बॉडी लोशनची पीएच पातळी खूप जास्त असते. त्यामुळे बॉडी लोशन लावल्याने त्वचेची आद्रता कमी होऊ लागते. त्वचेमधील खराब झालेल्या पेशींमध्ये वाढ होते आणि तुमच्या चेहऱ्यावरील त्वचा फुटते.

चेहरा निस्तेज दिसतो

हिवाळ्यात त्वचा जास्त निस्तेज दिसते.त्यावर बॉडी लोशन लावल्याने चेहऱ्याच्या त्वचेमध्ये अमीनो अॅसिड आणि क्षारचे प्रमाण कमी होते. ज्यामुळे तुमचा चेहरा निस्तेज आणि निर्जीव दिसतो.

बॉडी लोशन नाही तर हे लावा

घरात असलेले तूप, साय हे चेहऱ्याला लावण्याचे अनेक फायदे आहेत. कारण, या गोष्टी सहज उपलब्ध होतात आणि त्यामूळे त्वचा मुलायम राहते. तसेच, आठवड्यातून दोनवेळा चेहऱ्याला स्टीम घेणे फायद्याचे ठरू शकते.