सातारा : संपूर्ण महाराष्ट्राचं लक्ष लागलेल्या सिंधुदुर्ग जिल्हा बँक संचालक मंडळाच्या पंचवार्षिक सार्वत्रिक निवडणुकीची नुकतीच मतमोजणी पार पडली. सिंधुदुर्ग जिल्हा बँकेवर भाजपचं वर्चस्व दिसून आलंय. एकूण 19 जागांपैकी 11 जागांवर भाजपचा विजय, तर आठ जागांवर महाविकास आघाडीचा विजय झालाय. दरम्यान, सिंधुदुर्ग जिल्हा मध्यवर्ती बँकेच्या विजयानंतर (Sindhudurg District Bank Election) उपमुख्यमंत्री अजित पवार (Ajit Pawar) यांनी केंद्रीय मंत्री नारायण राणे (Narayan Rane) आणि निवडून आलेल्या सर्व संचालकांचं अभिनंदन केलंय. मात्र, अभिनंदन करत असताना अजितदादांनी राणेंच्या 'आता महाराष्ट्रावर लक्ष' या घोषणेचा चांगलाच समाचार घेतलाय.

उपमुख्यमंत्री अजित पवार हे आज सातारा (Satara) जिल्हा दौऱ्यावर आले आहेत. यावेळी शासकीय विश्रामगृहात त्यांनी माध्यमांशी संवाद साधला. दरम्यान, सिंधुदुर्ग जिल्हा बँक निवडणुकीच्या निकालाबाबत पवार म्हणाले, निवडणुकीत यश-अपयश येतचं असतं. या निवडणुकीत महाविकास आघाडीला बॅकफूटवर जावं लागलं. मात्र सातारा, सांगली, पुणे या ठिकाणी चांगलं यश मिळालंय, असं त्यांनी नमूद केलं.

सिंधुदुर्ग बँक निवडणुकीत केंद्रीय मंत्री नारायण राणे आणि भाजप महाविकास आघाडीला धक्का देणार की, महाविकास आघाडीचं पॅनेल पुन्हा सत्ता ताब्यात ठेवणार याकडं लक्ष लागलं होतं. आरोप-प्रत्यारोपांनी ही निवडणूक गाजली होती. त्यातच या निवडणूक प्रचारादरम्यान शिवसैनिक संतोष परब (Santosh Parab) यांच्यावरील प्राणघातक हल्ल्याप्रकरणी भाजप आमदार नितेश राणे (Nitesh Rane) यांच्यावर आरोप झाले होते. मात्र, या निवडणुकीत महाविकास आघाडीवर मात करत भाजपचं वर्चस्व असल्याचं दिसून आलंय. सिंधुदुर्गवर भाष्य करताना पवार पुढे म्हणाले, राणेंनी पुढं काय करावं, हा त्यांचा प्रश्न आहे. महाविकास आघाडी सरकार (Mahavikas Aghadi Government) पाच वर्षे टिकेल, असा विश्वास सुद्धा अजितदादांनी व्यक्त केला. महाविकास आघाडीचं सरकार पडेल, अशी चर्चा सातत्यानं केली जात आहे. आता नारायण राणेंच्या रुपानं आणखी एक माणूस आला आहे. खरं तर नारायण राणेंनी मागे असेच सन 1999 ते 2004 कालावधीत सरकार पाडण्याचा बराच प्रयत्न केला, परंतु त्यात त्यांना यश आलं नाही, याचा दाखला देत उपमुख्यमंत्र्यांनी राणेंचा चिमटा काढला.