खेड : शिवसेनेच्या उद्धव ठाकरे (Uddhav Thackeray) गटाकडून रायगड लोकसभा मतदारसंघातील उमेदवारी अनंत गीते यांना जाहीर झाली आहे. गत लोकसभा निवडणुकीत सुनील तटकरे (Sunil Tatkare) यांनी अनंत गीते यांना पराभूत करत राष्ट्रवादीचा झेंडा फडकवला होता. परंतु, त्यावेळी विजयासाठी त्यांची दमछाक झाली होती.

रायगड मतदारसंघातील सर्वच तालुक्यांत उलटसुलट राजकीय समीकरणे जुळवून तटकरेंनी विजयश्री खेचून आणली होती. हे आव्हान तटकरे कसे पेलतात हे आगामी निवडणुकीत दिसेल; मात्र गीतेंच्या उमेदवारीने लढत नक्कीच लक्षणीय ठरणार आहे.

उद्धव ठाकरे यांनी आपले नाव जाहीर केले असल्याची माहिती अनंत गीते (Anant Geete) यांना माध्यमांना दिली. सहा वेळा लोकसभा निवडणूक जिंकलेल्या अनंत गीते यांना उमेदवार बनवून शिवसेना उद्धव बाळासाहेब ठाकरे पक्षाने लोकसभा निवडणुकीचे रणशिंग फुंकले आहे. तयारीला लागा हा आदेश मिळाल्याने रायगड मतदारसंघात लक्षणीय लढत पाहायला मिळणार आहे.

इंडिया आघाडीच्या जागा वाटपात कोकणातील दोन्ही जागा शिवसेना उद्धव बाळासाहेब ठाकरे पक्षाला मिळाल्या आहेत. त्यामुळे ठाकरे यांनी लोकसभेच्या तयारीला जोमाने सुरुवात केली आहे. अनंत गीते यांना उमेदवारी जाहीर करण्यात आली आहे.

राष्ट्रवादी काँग्रेस अजित पवार समर्थक पक्षाचे प्रदेशाध्यक्ष सुनील तटकरे यांनी अनंत गीते यांना गत लोकसभा निवडणुकीत ३१,४३८ मतांनी पराभूत केले होते. या लोकसभा मतदार संघात रत्नागिरी जिल्ह्यातील दापोली - खेड - मंडणगड विधानसभा मतदार संघाचा समावेश होतो. गत निवडणुकीत प्रत्येक तालुक्यात सुनील तटकरे यांना त्यांच्या फायद्याची राजकीय समीकरणे जुळवावी लागली होती.

अंतर्गत दुफळी नडली

शिवसेनेतील अंतर्गत दुफळी गीते यांच्या पराभवाला कारणीभूत ठरल्याचे म्हटले जाते. परंतु यावेळी या मतदारसंघातील राजकीय चित्र पूर्णपणे स्पष्ट असून अनंत गीते यांचे हात बळकट करण्यासाठी इंडिया आघाडी सावध व्यूहरचना करत आहे.