आज पहाटे पुणे-मुंबई द्रुतगती मार्गावर (Pune-Mumbai Expressway) कारचा आणि माश्यांची वाहतुक करणाऱ्या छोटा हत्तीची (टेंपो) धडक लागल्याने अपघात घडलाय. यात कोणतीही जीवीत हानी झाली नाही पण कारचे मोठ्या प्रमाणात नुकसान झाले. हे नुकसान सहन न झाल्याने चिडलेल्या कार चालकाने चक्क छोटा हत्ती (टेंपो) पेटवून दिल्याची धक्कादायक घटना उघडकीस आली.

पुणे-मुंबई द्रुतगती मार्गावर सातत्याने अपघात होत असतात. अशातच आज पहाटे कारचा आणि छोटा हत्ती (टेंपो) चा अपघात घडला. या अपघातात कारचे मोठ्या प्रमाणावर नुकसान झाल्याने कार चालक चांगलाच संतापला आणि टेंपो चालकाशी हुज्जत घातली. प्रकरण इथेच थांबले नाही तर कार चालकाने चक्क समोरचा छोटा हत्ती (टेंपो) पेटवला. यात कुठलीही जीवीत हानी झाली नाही. घटनेची माहिती लोणावळा पोलीसांना मिळताच त्यांनी घटनास्थळ गाठले. या प्रकरणी लोणावळा पोलीस स्टेशनमध्ये गुन्हा दाखल केलाय.