Navneet Rane On Bacchu Kadu : काही दिवसांपूर्वीच अपक्ष आमदार बच्चू कडूंनी कार्यकर्त्याला मारहार केल्याचा व्हिडिओ समोर आला होता. त्यानंतर अनेक स्तरातून बच्चू कडू यांच्यावर टीकेची झोड उठली होती. त्यानंतर आता या प्रकरणावर आमरावतीच्या अपक्ष खासदार नवनीत राणा यांनी कडूंना मोलाचा सल्ला दिला आहे. यावेळी त्यांनी उद्धव ठाकरेंवरही जोरदार हल्लाबोल केला.

नवनीत राणा म्हणाल्या की, नुकत्याच घडलेल्या घटनेतून बच्चू कडू यांचे स्वतःच्या रागावरील नियंत्रण सुटत असल्याचे दिसून येत आहे. त्यामुळे बच्चू कडूंना रागाच्या बाबतीत स्वतःवरच नियंत्रण संभाळण्याची गरज आहे, असा सल्ला राणा यांनी दिला आहे. पुढे बोलताना त्या म्हणाल्या की, कार्यकर्ते नेत्यांना निर्माण करत असतात. त्यामुळे त्यांच्यावर अशाप्रकारे हात उचलणे त्यांचा अपमान असल्याचे म्हटले आहे.

दरम्यान, कार्यकर्त्याला मारहाण न केल्याचा खूलासा बच्चू कडू यांनी केला आहे. मात्र, समोर आलेल्या व्हिडिओमधून असा प्रकार घडल्याचे राणा यांनी म्हटले आहे. अशा घटनांमुळे कार्यकर्त्यांमध्ये चुकीचा संदेश जाऊ शकतो. त्यामुळे बच्चू कडूंनी रागावर आणि स्वतःवर नियंत्रण ठेवणे गरजेचे आहे.

उद्धव ठाकरेंवर जोरदार हल्लाबोल

यावेळी नवनीत राणांनी उद्धव ठाकरेंवरही भाष्य करत जोरदार हल्लाबोल केला. त्या म्हणाल्या की, उद्धव ठाकरे मुख्यमंत्री असताना जर त्यांनी संघर्ष केला असता तर, आजची परिस्थिती आली नसती. शिवसेनेचे कार्यकर्ते आता एकनाथ शिंदे यांच्यासोबत असून, बाळासाहेबांना मानणारे खरे कार्यकर्तेच शिंदेंसोबत राहतील. तर बळजबरीनं येणारे कार्यकर्ते हे उद्धव ठाकरे यांच्या दसरा मेळाव्यात राहतील असा खोचक टोला राणा यांनी लगावला आहे.