सध्या सोशल मीडियावर सांगोल्याचे शिवसेनेचे आमदार शहाजी बापू पाटील यांच्या आवाजातील एक व्हिडिओ व्हायरल होत आहे. यामध्ये त्यांनी म्हटंलेली काही वाक्य सध्या चांगलीच चर्चेत आहे. 'आम्ही सध्या गुवाहाटी आहे. काय झाडी, काय डोंगार, काय हाटील...येकदम ओक्केमध्ये आहे', या डायलॉगमुळे ते या तापलेल्या राजकीय वातावरणात चर्चेत आले आहेत. सध्या अनेक मीम्स या डायलॉगवर आपल्याला पाहायला मिळत आहेत. (Shahaji Patil News)

या पार्श्वभूमीवर आता शहाजी पाटलांची सहा महिन्यांपूर्वी झालेल्या पत्रकार परिषदेतील संवाद व्हायरल होत आहे. माझ्यावर कोणताही अन्याय झालेला नाही. मुख्यमंत्री उद्धव ठाकरे यांनी दोन वर्षात आपल्याला 240 कोटींचा विकासनिधी दिल्याचं ते सांगत आहेत. तसंच मी जिवंत असेपर्यंत माझे नेते उद्धवजी ठाकरे हेच राहतील, असंही ते म्हणाले होते. (Shiv Sena News)

सध्या आमदार शाहजी पाटील यांचे कॉल रेकॉर्डिंग व्हायरल झालं आहे. पुरेसा विकासनिधी मिळत नसल्याने पाटील यांनी नाराजी व्यक्त केली आहे. येणाऱ्या काळात मुख्यमंत्री देवेंद्र फडणवीस आणि उपमुख्यमंत्री एकनाथ शिंदे होतील मग आपल्या मतदारसंघात ऐतिहासिक कामं करु असंही ते म्हणाले आहेत. त्यांच्या या वक्तव्यामुळे राजकीय वर्तुळात चर्चांना उधाण आलं आहे.

दरम्यान, नुकत्याच व्हायरल झालेल्या पत्रकार परिषदेतील संवादात विकासनिधीबाबत माझ्यावर कोणताही अन्याय झाला नाही, असं शहाजी पाटील यांनी म्हटलं होतं. मात्र यापूर्वीच्या व्हायरल कॉल रेकॉर्डिंगमध्ये माझं घरदार बरबाद झालं. पाटलाची सून असून माझ्या बायकोला लुगडं मिळालं नाही, अशी खंत आमदार शाहाजी पाटील यांनी व्यक्त केली होती.