मुंबईः आज शिवसेनेचा वर्धापन दिन आहे. ठाकरेंच्या शिवसेनेच्या वतीने आमदार नितीन देशमुख यांचा एक पॉडकास्ट प्रसिद्ध करण्यात आलेला आहे. यामध्ये एकनाथ शिंदेंसोबत नितीन देशमुख यांनाही गाडीत बसवून नेण्यात आलेलं होतं. त्या प्रसंगाची संपूर्ण आपबिती त्यांनी विषद केलीय.

शिवसेनेच्या पॉडकास्टमध्ये आमदार नितीन देशमुख सांगतात की, विधान परिषदेच्या निवडणुका झाल्यानंतर एकनाथ शिंदे हे मला विधानभवनातच भेटले आणि म्हणाले नितीन आपण बंगल्यावरुन जावून येऊ. मी परतीची तिकीटं काढून ठेवली होती. परंतु मी निघालो. पीएला फोन करुन ठाण्याला बॅगा घेऊन येण्यास सांगितलं.

देशमुख पुढे सांगतात, आम्ही ठाण्याऐवजी थेट पुढे निघालो आणि पालघरला गेलो. एका ठिकाणी चहाला थांबलो तेव्हा तिथे मंत्री अब्दुल सत्तार, संदीपान भूमरे, शंभूराज देसाई यांच्या गाड्या दाखल झाल्या. मला कुणकुण लागली की काहीतरी गडबड आहे. परंतु आपण शिवसेनेशी एकनिष्ठ आहोत, हे मला ठाऊक होतं. मी पानटपरीवाल्याला विचारलं हा रस्ता कुठे जातो. तो म्हणाला सुरतला जातो.

एकनाथ शिंदे सलग फोनवर बोलत होते

पालघरमधून कोल्हापूरच्या आमदारांना दुसऱ्या गाडीत बसवून दिले. मी शिंदेंच्या गाडीत बसलो होतो. शिंदे साहेबांचा पीए प्रभाकर सोबत होता. तसेच संदीपान भूमरे, अब्दुल सत्तार असे चौघे मागच्या सीटवर. शिंदे साहेब समोरच्या सीटवर बसलेले होते. मात्र यादरम्यान शिंदेंचे फोन सुरु झाले. एकनाथ शिंदे सलग फोनवर बोलत होते. तो निघाला का, हा निघाला का.. त्या गाड्या कुठपर्यत पोहोचल्या, या गाड्यात कुठवर्यंत पोहोचल्या... मग मला सगळा अंदाज आला. परंतु मी ठाम होतो. असा थरारक अनुभव नितीन देशमुख यांनी सांगितला.