nashik graduate election : नाशिक पदवीधर मतदारसंघाच्या निवडणुकीतील उमेदवारीवरून राज्यातील राजकारण तापलेलं आहे. कॉंग्रेसने डॉ.सुधीर तांबे यांच्यावर शिस्तभंगाची कारवाई करत त्यांना कॉंग्रेस पक्षातून निलंबित केलं. यानंतर सुधिर तांबे यांनी माध्यमांना प्रतिक्रिया दिली आहे.

काँग्रेस पक्षाकडून झालेल्या निलंबनाच्या कारवाईनंतर सुधीर तांबे यांनी प्रतिक्रिया देताना मला या बद्दल काहीही बोलायचं नसल्याचे सांगितेल ते म्हणाले की, आता पक्ष चौकशी करतोय, ती होईपर्यंत मी काही बोलणार नाही असं त्यांनी स्पष्ट केलं.

भाजपमध्ये सहभागी होण्याच्या प्रश्नावर बोलतान सुधीर तांबे म्हणाले की, अशा चर्चा होत असतात, त्यात काही तथ्य नाहीये. भाजपला आम्ही पाठिंबा मागितलेला नाही. आम्ही मागीतला नसताना ते तरी कसे देतील? असेही तांबे यावेळी म्हणाले.

मात्र सत्यजीत तांबे यांनी भाजपकडे निवडणूकीत मदत करण्याची मागणी केली होती याबद्दल विचारले असता हा प्रश्न तुम्ही त्यांनाच विचारा असे माध्यमांशी बोलताना सुधीर तांबे म्हणाले आहेत.

तसेच "माझ्या संदर्भाने काँग्रेस पक्षाने घेतलेली भूमिका ही न्यायाला धरून नाही, असे माझे स्पष्ट मत आहे. चौकशीअंती सत्य समोर येईल. न्यायावर माझा विश्वास आहे." असे ट्विटही त्यांनी केले आहे.

नाशिक पदवीधर मतदार संघाच्या निवडणुकीत कॉंग्रेसकडून सुधीर तांबे यांना उमेदवारी देण्यात आली होती. पंरतु,त्यांनी काँग्रेसकडून उमेदवारी अर्ज भरला नाही. उलट त्यांचा मुलगा सत्यजित तांबे (Satyajeet Tambe) यांनी अपक्ष उमेदवारी अर्ज भरला. यानंतर त्यांच्यावर निलंबनाची कारवाई करण्यात आली आहे. या संपूर्ण प्रकरणाची चौकशी करणार असल्याचं सांगत चौकशी पूर्ण होईपर्यंत डॉ. सुधीर तांबे यांचं काँग्रेस पक्षातून निलंबन केलं गेलं आहे.

यानंतर काँग्रेसचे प्रदेश अध्यक्ष नाना पटोले यांनी या प्रकरणात हायकमांडला अहवाल पाठविला होता. त्यानंतर काँग्रेसच्या शिस्तपालन समितीने निलंबनाची कारवाई केली आहे. सुधीर तांबे यांना पक्षातून निलंबित करण्यात आलं आहे. तसेच आता त्यांच्याविरोधात चौकशीही केली जाणार आहे. त्यांची चौकशी पूर्ण होईपर्यंत हे निलबंन असणार आहे.