Movie Box Office Collection News बॉक्स ऑफिसवर अक्षय कुमारचा रक्षाबंधन हा चित्रपट आमिर खानच्या (Aamir Khan) लाल सिंग चड्ढा या चित्रपटाशी स्पर्धा करीत आहे. बॉक्स ऑफिस कलेक्शनच्या बाबतीत दोन्ही चित्रपटांमध्ये चुरशीची स्पर्धा आहे. आतापर्यंत आमिर खानचा लाल सिंग चड्ढा हा अक्षय कुमारच्या (Akshay Kumar) रक्षाबंधनाच्या पुढे होता. मात्र, मंगळवारी (ता. १६ ऑगस्ट) रक्षाबंधनाने लाल सिंह चड्ढापेक्षा जास्त कमाई केली आहे.

अनेक दिवसांपासून बॉलिवूडचे चाहते लाल सिंग चड्ढा आणि रक्षाबंधनाच्या रिलीजची वाट पाहत होते. रक्षाबंधनाच्या खास मुहूर्तावर दोन्ही चित्रपट चित्रपटगृहामध्ये प्रदर्शित झाले. लाल सिंग चड्डा आणि रक्षाबंधन यांच्याकडून चाहत्यांना चांगल्या कमाईची अपेक्षा होती. परंतु, दोन्ही चित्रपटांना लाँग वीकेंडचा फायदा मिळाला नाही.

एकीकडे आमिर खानचा (Aamir Khan) लालसिंग चड्ढा अद्याप ५० कोटी जमा करू शकलेले नाही. दुसरीकडे अक्षय कुमारच्या चित्रपटाने १६ ऑगस्टला आमिरच्या चित्रपटापेक्षा जास्त कमाई केली आहे. मंगळवारी लालसिंग चड्ढाची कमाई दोन कोटी होती. मात्र, अक्षय कुमारच्या चित्रपटाने सहाव्या दिवशी २.१० कोटींचा व्यवसाय केला आहे. ७० कोटींमध्ये बनलेल्या रक्षाबंधन चित्रपटाचे एकूण बॉक्स ऑफिस कलेक्शन ३६.५७ कोटी झाले आहे. चित्रपटाचे बजेट काढणेही कठीण झाले आहे.

रक्षाबंधनाची कमाई हळूहळू वाढत आहे. मात्र, आतापर्यंत या चित्रपटाने जेवढी कमाई केली आहे ती चांगली नाही. यावर्षी अक्षय कुमारचा (Akshay Kumar) हा तिसरा फ्लॉप चित्रपट आहे. आमिरच्या चित्रपटाला रक्षाबंधनापेक्षा चांगले रिव्ह्यू मिळत आहेत. असे असूनही सहाव्या दिवशी लाल सिंग चड्ढाने अक्षयच्या चित्रपटापेक्षा कमी व्यवसाय केला.

दोन्ही चित्रपटांमध्ये टक्कर

लाल सिंग चड्ढाने सहा दिवसांत ४८ कोटींची कमाई केली आहे तर रक्षाबंधनने ३६.५७ कोटींचा व्यवसाय केला आहे. परंतु, रक्षाबंधनने मंगळवारी लाल सिंग चड्डापेक्षा चांगली कमाई केली. हे पाहता दोन्ही चित्रपटांमध्ये कमाईसाठी टक्कर पाहायला मिळत आहे. आता कोणता चित्रपट किती कमाई करेल हे जाणून घेण्यासाठी थोडी वाट पाहावी लागेल.

आगामी चित्रपट निराश करणार?

लाल सिंह चड्ढा आणि रक्षाबंधन या दोन्ही चित्रपटांनी प्रेक्षकांना निराशा केली आहे. आशा आहे की आगामी चित्रपट कलेक्शन आणि कथेच्या बाबतीत चाहत्यांना निराश करणार नाही. आगामी चित्रपटात हृतिक रोशनचा विक्रम वेध, रणबीर कपूर आणि आलिया भट्टचा ब्रह्मास्त्र आणि बॉलिवूडचा बादशाह शाहरुख खानचा पठाण यांचा समावेश आहे.