asha bhosle : गानसाम्राज्ञी लता मंगेशकर (lata mangeshkar) यांना जाऊन काही महिने उलटले तरी अद्याप त्यांच्या जाण्याने निर्माण झालेली पोकळी भरून निघालेली नाही, मंगेशकर कुटुंबीय अजूनही त्या दुःखातून बाहेर आलेले नाही. त्यातही आशा भोसले आणि लता दीदी या बहिणींचे प्रेम काही वेगळेच आहे. लता दीदींच्या जाण्यानंतर अनेकदा आशा भोसले भर मंचावर भावूक झाल्या आहेत. आता पुन्हा एकदा त्यांनी या आठवणींना उजाळा दिला आहे.

स्टार प्लस (star plus) वाहिनीने लता दिदींना श्रद्धांजली वाहण्यासाठी 'नाम रह जाएगा' (naam rah jayega) हा कार्यक्रम सुरु केला आहे. या कार्यक्रमात सोनू निगम, शंकर महादेवन, अलका याज्ञीक, कुमार शानू, अमित कुमार यांच्यासह जवळपास १८ प्रसिद्ध भारतीय गायक सहभागी होणार आहेत. याच कार्यक्रमात आशाबाई बोलत होत्या. त्या म्हणाल्या, ''लता दीदी एक सर्वसाधारण आयुष्य जगत होत्या. सुरुवातीला दिदी ८० रुपये महिना कमावयच्या. आम्ही ५ माणसं होतो आणि तेवढ्याच पैशात आम्हाला घरखर्च चालवावा लागत असे. आमच्याकडे बरेच नातेवाईक यायचे अशावेळीही दिदी काही बोलत नसे. अनेकदा अशीही वेळ यायची की आम्ही २ आण्यांचे कुरमुरे विकत घ्यायचो आणि चहासोबत ते खाऊन झोपून जायचो.'

पुढे त्या म्हणाल्या, 'लता दिदींनी एकदा कुठेतरी वाचलं होतं की जर तुम्ही तुमच्या आई- वडिलांचे पाय धुवून ते पाणी प्यायलं तर तुम्ही आयुष्यात खूप यशस्वी व्हाल. तेव्हा त्यांनी मला पाणी आणण्यास सांगितंल. दीदींनी एक ताट घेतलं आणि आई- वडिलांचे पाय धुतले आणि स्वतः ते पाणी प्यायला आणि आम्हा सर्व भावंडांना ते पाणी पिण्यास सांगितलं. कदाचित आम्ही त्यामुळेच यशस्वी आहोत,' असे अशा भोसले म्हणाल्या.