आथिया शेट्टी(Athia Shetty) आणि के.एल.राहूल(K.L.Rahul) काही दिवसांपासून रीलेशनशीपमध्ये आहेत,आणि अर्थात त्यामुळे चर्चेत आहेत. दोघांना गेल्या काही दिवसांपासून एकत्र अनेकदा स्पॉट केलं गेलं. इतकंच नाही तर के.एल,राहूलच्या प्रत्येक मॅच प्रसंगी आथिया त्याला पाठिंबा देताना,चिअर करताना दिसली आहे. गेल्या आठवड्यापासून अचानक त्यांच्या लग्नाची बातमी आली आणि व्हायरल झाली. जो-तो यांच्या लग्नाच्या बातमीवर चर्चा रंगवताना दिसला. या बातमीवर काही दिवस आधी आथियाच्या भावाची प्रतिक्रिया आली होती. आता आथियानं स्वतः यावर प्रतिक्रिया दिली आहे. बातमी होती की आथिया शेट्टी आणि के.एल.राहूल डिसेंबरमध्ये लग्न करीत आहेत आणि बान्द्र्यात दोघांनी एक आलिशान घर घेतलं आहे. ज्या घरात ते लग्नानंतर शिफ्ट होणार आहेत.

आथियानं आपल्या अधिकृत सोशल मीडिया अकाऊंटवरनं सांगितंल आहे की,''मी सध्या कोणासोबतही कुठेच शिफ्ट होणार नाही. हो,पण मी माझ्या कुटुंबासोबत नवीन घरात रहायला जात आहे''. सध्या आथिया आपल्या कुटुंबासोबत दक्षिण मुंबईत राहत आहे. त्यानंतर लग्नाविषयी पसरलेल्या बातम्यांवर आथिया म्हणाली,''मी या प्रश्नांचं काहीच उत्तर देणार नाही. मला आता कंटाळा आलाय या अशा प्रश्नांचा,कितीतरी वेळा तर मला हसायला येत यावर. लोकांना सध्या जो विचार करायचा आहे तसा ते करू शकतात''.

आथियाचा भाऊ अभिनेता अहान शेट्टीनं एका मुलाखतीत तिच्या लग्नांच्या बातम्यांवर म्हटलं होतं,''असं काहीच नाही आहे. या सगळ्या अफवा आहेत. जर लग्नच होणार नाही तर लग्नाची तारीख कशी सांगू? साखरपुडा देखील झालेला नाही. आथियाच्या लग्नाविषयी सध्या काहीच प्लॅनिंग नाही आहे. आणि अजून काही महिने याचा विचार आमच्या कुणाच्या मनात नाही''.

आथिया आणि के.एल.राहूल कधीच अशा बातम्यांवर प्रतिक्रिया देत नाहीत. पण जेव्हा अहान शेट्टीच्या 'तडप' सिनेमाच्या प्रीमियरला के.एल.राहूल आला तेव्हा त्यानं या नात्याला एका अर्थाने अधिकृत केल्याची सूचना दिली होती. आथिया शेवटची २०१९ मध्ये 'मोतीचूर चकनाचूर' सिनेमात नवाझुद्दिन सिद्दिकीसोबत दिसली होती. सध्या ती एका नव्या प्रोजेक्टवर काम करीत आहे ज्याविषयी कदाचित ती लवकरच घोषणा करू शकते.