Bigg Boss : मराठी मालिका विश्वात 'बिग बॉस' ही संकल्पना रुजेल का याबाबत अनेकांना शंका होती. पण काही वर्षांपूर्वी बिग बॉस मराठीत सुरु झाला आणि प्रेक्षकांनी अक्षरशः डोक्यावर घेतलं. दैनंदिन मालिकांमधील काल्पनिक कुरघोड्या पाहण्यापेक्षा एका घरात बंद असलेल्या लोकांमध्ये घडणाऱ्या खऱ्या कुरघोड्या प्रेक्षकांच्या चांगल्याच पसंतीस पडल्या. बघता बघता या मालिकेचे तीन सीजन झालेही आणि आता चौथा सीजन कधी येणार याची उत्सुकता प्रेक्षकांना लागली आहे. (bigg boss marathi season 4)

विविध माध्यमातील कलाकार, काही प्रसिद्ध तर काही नवोदित चेहरे यांना एकत्र करून तब्बल १०० दिवस एका घरात एकत्र ठेवले जाते. या शंभर दिवसांच्या खेळात त्या कलाकारांचे खरे चेहरे लोकांसमोर येतात. प्रेम, भांडणं, जिव्हाळा, कुरघोड्या असं मनोरंजनाचं मोठं पॅकेज या कार्क्रमात असतं. पहिल्या पर्वात मेघा धाडेने बाजी मारली, दुसरे पर्व शिव ठाकरे जिंकला तर तिसऱ्या पर्वावर विशाल निकम याने आपले नाव कोरले. या तीनही पर्वाने प्रेक्षकांना पुरते वेडे केले. त्यामुळे चौथे पर्व कधी येणार याकडे अनेकांचे लक्ष लागले आहे

एका पोर्टलने दिलेल्या माहितीनुसार, बिग बॉस मराठीचे (bigg boss marathi) चौथे पर्व लवकरच येणार आहे. हा चौथा सीझन १० जुलैनंतर प्रेक्षकांच्या भेटीला येईल तर जून महिन्यात या सीझनचे प्रोमो बाहेर येतील. गेल्या काही पर्वाच्या आखणीवरुन हा अंदाज बांधण्यात आल्याचे समजते. शिवाय करोना स्थितीही आटोक्यात असल्याने वाहिनीकडूनही (colors marathi) चौथ्या सीजनबाबत सकारात्मकता आहे. या पर्वाचे सूत्रसंचालन कोण करणार असा प्रश्न चाहत्यांना आहे. याबाबत अद्याप खुलासा झाला नसला तरी महेश मांजरेकरच (mahesh manjrekar) हेही पर्व होस्ट करतील असे दिसते आहे.