Kajol: ६८ व्या राष्ट्रीय पुरस्कार सोहळ्याचं आयोजन ३० सप्टेंबर,२०२२ रोजी नवी दिल्लीत करण्यात आलं होतं. भारताच्या राष्ट्रपती दौपदी मुर्मु यांच्या तर्फे सर्व विजेत्यांना पुरस्कार प्रदान करण्यात आले. कोरोनाच्या प्रादुर्भावामुळे हा सोहळा तब्बल २ वर्षाच्या अंतरानं पार पडला. यावर्षी उत्कृष्ट अभिनेत्याचा पुरस्कार अभिनेता अजय देवगण याला त्याच्या 'तानाजी' सिनेमासाठी, तर 'सोरारुई पोटारु'साठी साऊथस्टार सूर्या यांना मिळाला.

सूर्याची पत्नी अभिनेत्री ज्योतिका हिनं सोशल मीडियावर 'प्राउड वाइफ' अशी पोस्ट शेअर केली तर दुसरीकडे आपल्या काजोलने अजयची प्रशंसा करणारी एक फनी पोस्ट शेअर केली. आणि तिची ती पोस्ट सोशल मीडियावर जोरदार व्हायरल होत आहे.(Kajol reaction after Ajay Devgan got National Award..)

काजोलनं इन्स्टाग्रामवर अजय देवगचा फोटो शेअर केला आहे,ज्यात राष्ट्रापती दौपदी मुर्मु यांच्याकडून तो नॅशनल अॅवॉर्ड स्विकारताना दिसत आहे. या फोटोला शेअर करत काजोलनं कॅप्शनमध्ये लिहिलं आहे की,''घरी दोन दोन नॅशनल अॅवॉर्ड घेऊन येणं आणि चांगलं दिसणं खूप कठीण आहे''. तसं पाहिलं तर पुरस्कार सोहळ्यात अजय सूटा बूटात खूप हॅंडसम दिसत होता.आणि म्हणूनच काजोलनं आपल्या मजेदार स्टाईलमध्ये त्याची प्रशंसा करताना फिरकी घेण्याची संधी मात्र सोडली नाहीय.

अजय देवगणला 'तानाजी-द अनसंग वॉरियर' सिनेमातील त्याच्या भूमिकेसाठी उत्कृष्ट अभिनेत्याचा पुरस्कार मिळाला आहे. याआधी देखील अजयनं आपल्या 'जख्म' आणि द' लीजेंड ऑफ भगत सिंग' सिनेमांसाठी राष्ट्रीय पुरस्कार पटकावला आहे.

यावेळी अजय देवगण सोबत उत्कृष्ट अभिनेत्याचा पुरस्कार साउथ स्टार सूर्याला त्याच्या 'सोरारुई पोटारू' सिनेमासाठी विभागून देण्यात आला. 'सोरारुई पोटारू' नं तब्बल ५ राष्ट्रीय पुरस्कारांवर आपलं नाव कोरलं. 'सोरारुई पोटारू' सिनेमाला उत्कृष्ट सिनेमा,उत्कृष्ट अभिनेता,उत्कृष्ट अभिनेत्री, बेस्ट ओरिजनल स्क्रीन प्ले आणि उत्कृष्ट बॅकग्राउंड स्कोर असे पाच राष्ट्रीय पुरस्कार मिळाले आहेत.

अजय देवगणने अभिनेता सूर्यासोबत एक फोटो सोशल मीडियावर शेअर केला आहे. ''सूर्यासोबत पुरस्कार सोहळ्यात एकत्र खूप चांगला वेळ घालावायला मिळाला. मी त्याच्या टॅलेंटचा आदर करतो,त्याचे सिनेमे देखील मला खूप आवडतात'',असं अजयनं आपल्या पोस्टमध्ये सूर्याविषयी लिहिलं आहे.