नागराज मंजुळेचे(Nagraj Manjule) सिनेमे म्हणजे समाजमनाचं टिपलेलं सुरेख चित्रण. त्याच्या सिनेमानं नेहमीच खऱ्याची बाजू मांडली. 'सिनेमॅटिक लिबर्टी' म्हणून जो काही शब्द मनोरंजन क्षेत्रात प्रचलित आहे तो त्यानं तसा फारसा आपल्या सिनेमातील कथानकासाठी वापरला नाहीच मुळी. त्याच्या 'पिस्तुल्या' या शॉर्ट फिल्मपासून सैराट,फॅन्ड्री,नाळ अशा अनेक सिनेमांनी प्रेक्षकांच्या काळजाला हात घातला असं म्हटलं तर अतिश्योक्ती ठरू नये. आता याच नागराज मंजुळेचा 'झुंड' सिनेमा बहुप्रतिक्षेनंतर अखेर भेटीला येत आहे. महानायक अमिताभ बच्चन(Amitabh Bachchan) आणि दिग्दर्शनातील महानुभव असलेला नागराज यांचं बेस्ट कॉम्बिनेशन घेऊन 'झुंड' भेटीस येणार म्हणजे मनोरंजनाची चविष्ट मेजवानी असणार यात शंकाच नाही. या सिनेमाची सारेच आतुरतेने वाट पहात होते.

दीर्घकाळापासून रखडलेला हा सिनेमा कधी प्रदर्शित होणार हे जाणून घेण्यासाठी आपण सारेच प्रेक्षक उत्सुक असाल. तर नागराज मंजुळे दिग्दर्शित 'झुंड' हा सिनेमा येत्या ४ मार्चला प्रेक्षकांच्या भेटीस येत आहे. या सिनेमात बिग बी मुख्य भुमिकेत दिसणार आहेत. नागराज मंजुळेनं त्याच्या इन्स्टाग्राम अकाऊंटवर झुंड चे पोस्टर शेअर करीत प्रदर्शनाची तारीख जाहिर केली आहे. अमिताभ बच्चन यांनीही याबाबत पोस्ट शेअर केली आहे. ''इस टोली से मुकाबला करने के लिए रहो तैयार. हमारी टीम आ रही है'', अशा कॅप्शनसह त्यांनी झुंड ची प्रदर्शनाची तारीखही निश्चित झाल्याचं सांगितलं आहे.

कोरोनाच्या(Corona) संकटात या सिनेमाचं प्रदर्शन रखडलं होतं. पण पुढे लॉकडाऊन उठल्यानंतरही 'झुंड' कायद्याच्या कचाट्यात अडकल्यामुळे प्रदर्शन पुन्हा रखडलं. अर्थात आता सगळे अडथळे पार केल्यानंतर झुंडची प्रदर्शनाची तारीख निश्चित झाली आहे. सिनेमागृहात 'झुं'ड भेटीला येतोय ही प्रेक्षकांसाठी मोठी गूड न्यूज आहे. हा सिनेमा विजय बारसे या फुटबॉल प्रशिक्षकाच्या जीवनावर आधारित आहे. विजय बारसे यांनी गरीब वस्तीत राहणाऱ्या मुलांची फुटबॉल टीम बनवली होती. याच कथेवर आधारित हा सिनेमा आहे. हा एक स्पोर्ट ड्रामा आहे.